نئی دہلی(این این آئی )انڈیا پرسیکیوشن ٹریکر کی رپورٹ نے مذہبی بنیادوں پر ہندو انتہا پسندوں کے نفرت انگیز جرائم کا پردہ فاش کر دیا۔
انڈیا پرسیکیوشن ٹریکر کی رپورٹ کے مطابق 2026 کے ابتدائی چار ماہ میں بھارت کی 8 ریاستوں میں ہندو انتہا پسندوں نے 13 مسلمانوں کو قتل کیا، جبکہ ساوتھ ایشیا جسٹس کمپین کے ٹریکر نے ہجومی تشدد اور ریاستی عناصر کی بدولت مسلمانوں کے قتل عام کی نشاندہی کر دی۔رپورٹ کے مطابق جعلی پولیس مقابلوں، متنازع فوجی آپریشن، دورانِ حراست مشکوک ہلاکتوں اور ریاستی کارروائیوں نے 4 مسلمانوں کی زندگی چھین لی، بھارت میں مسلمانوں کو بے دخلی، جبری نقل مکانی اور بنیادی شہری حقوق سے محرومی کا سامنا ہے، بھارتی مسلمانوں کو نماز پڑھنے اور روزے افطار کرنے جیسے مذہبی فریضوں پر بھی گرفتار کیا گیا۔
متنازع سپیشل انٹینسیو ریویژن کے ذریعے 13 ریاستوں میں 56 ملین سے زائد ووٹرز بالخصوص مسلمانوں کو انتخابی فہرستوں سے نکال دیا گیا ہے، تاہم مودی، بھارتی وزیر داخلہ اور بی جے پی کے وزرائے اعلی نفرت انگیز تقاریر میں مسلمانوں کیخلاف مسلسل زہر اگلنے میں مصروف ہیں۔عالمی ماہرین کے مطابق بھارت میں ریاستی طاقت کا وحشیانہ استعمال کرتے ہوئے اقلیتوں بالخصوص مسلمانوں کو نشانہ بنایا جاتا ہے، عالمی اداروں نے مودی کے اقلیتوں پر بہیمانہ مظالم کے اعدادوشمار جاری کر کے بھارت کا نام نہاد سیکولر چہرہ بے نقاب کر دیا۔
