پٹنہ (این این آئی)بھارتی ریاست بہار میں 23 سالہ سنجو کماری کو شادی کے صرف 4 دن بعد مبینہ طور پر جہیز کے تنازع پر قتل کر دیا گیا۔

بھارتی میڈیا کے مطابق دلہن کے اہلِ خانہ نے بتایا ہے کہ دولہا ونود پال اور اس کے گھر والوں نے سونے کی چین کا مطالبہ کیا تھا جو فوری طور پر پورا نہ ہونے پر سنجو کو مسلسل ذہنی اور جسمانی تشدد کا نشانہ بنایا گیا۔بھارتی میڈیا نے بتایا کہ سنجو کی شادی 7 مئی کو دھوم دھام سے ہوئی تھی، لڑکی والوں نے تقریبا 4 لاکھ روپے نقد، موٹر سائیکل، فریج، فرنیچر، برتن اور سونے چاندی کے زیورات بھی دیے تاہم سونے کی چین نہ دینے پر دولہا کے گھر والے ناراض تھے۔دلہن کے بھائی شیوم پال کے مطابق شادی کے بعد بہن کو گھر والوں سے بات کرنے نہیں دیا جاتا تھا، خفیہ طور پر فون کرنے پر بھی اسے مارا پیٹا گیا، سنجو نے اپنے گھر والوں کو ایک خفیہ کال میں بتایا تھا کہ سسرال میں اسے بہت پریشان کیا جا رہا ہے۔مقتولہ کے اہلِ خانہ کا کہنا تھا کہ 11 مئی کو ونود کی والدہ نے فون پر دھمکی دی کہ تمہاری بہن زندہ واپس نہیں آئے گی، اب اس کی لاش ہی نکلے گی، اسی دوران سنجو کی چیخ سنائی دی اور کال منقطع ہو گئی۔اگلے روز خاندان کو اطلاع ملی کہ سنجو کی موت ہو گئی ہے،

سسرال پر الزام ہے کہ سنجو کا گلا دبا کر قتل کیا گیا اور ثبوت مٹانے کے لیے لاش کو جلدی میں جلا دیا گیا، جب اہلِ خانہ شمشان گھاٹ پہنچے تو لاش کا بیشتر حصہ جل چکا تھا۔بھارتی میڈیا کے مطابق پولیس نے سنجو کے شوہر ونود پال، اس کے والدین، بہن اور بہنوئی کے خلاف مقدمہ درج کر لیا ہے، ساس سمیترا دیوی کو گرفتار کر لیا گیا ہے جبکہ دیگر ملزمان فرار ہیں۔پولیس قتل اور خودکشی دونوں پہلوں سے تحقیقات کر رہی ہے۔