واشنگٹن (این این آئی)امریکی صدر ڈونلڈ ٹرمپ نے ایران کو معاہدے یا تباہی کے درمیان انتخاب کا اختیار دے دیا
اور دونوں ملکوں کے درمیان جنگ ختم کرنے کے مقصد سے ہونے والے مذاکرات میں ایران کی جانب سے پیش کی گئی تازہ ترین تجویز پر عدم اطمینان کا اظہار کردیا۔ٹرمپ نے وائٹ ہائوس میں صحافیوں سے گفتگو کرتے ہوئے کہا کہ وہ ایک معاہدے تک پہنچنا چاہتے ہیں، لیکن میں اس سے مطمئن نہیں ہوں، اس لیے ہم دیکھیں گے کہ کیا ہوتا ہے۔ ٹرمپ نے تجویز میں نظر آنے والی خامیوں کی وضاحت نہیں کی۔انہوں نے کہا کہ ہم اس وقت فون کے ذریعے ایران کے ساتھ مذاکرات کر رہے ہیں اور ہم نے بات چیت میں پیش رفت کی ہے۔ امریکی صدر نے کہاکہ مجھے یقین نہیں ہے کہ ہم ایران کے ساتھ کسی معاہدے تک پہنچ پائیں گے۔
ٹرمپ نے ایرانی قیادت کو بھٹکی ہوئی قرار دیتے ہوئے کہا کہ ایرانی رہنما منقسم ہیں اور وہ آپس میں متفق نہیں ہیں۔انہوں نے تہران کے اندر متصادم رجحانات کی موجودگی کی طرف اشارہ کرتے ہوئے کہا کہ کچھ لوگ ہیں جو مذاکرات کرنا چاہتے ہیں، لیکن وہ الجھن کا شکار ہیں۔
