واشنگٹن (این این آئی)اس وقت جب امریکی صدر نے ایران کے ساتھ معاہدے تک پہنچنے کے حوالے سے اپنی پرامیدی کا اظہار کیا ہے،
ایرانی سرکاری ایجنسی نے اطلاع دی کہ تہران نے امریکہ کے ساتھ مذاکرات کے دوسرے دور میں شرکت کرنے سے انکار کر دیا ہے۔سرکاری ایجنسی نے ایران کے حوالے سے امریکہ کے غیر معقول اور غیر حقیقی مطالبات، اس کے موقف میں بار بار تبدیلی، مسلسل تضادات اور نام نہاد بحری محاصرے کے تسلسل کا بتایا اور کہا کہ ان حالات میں، بامقصد مذاکرات کے لیے کوئی واضح افق موجود نہیں ہے۔ایرانی نیوزایجنسی نے اپنی اس رپورٹ میں کسی مخصوص ذریعے کا ذکر نہیں کیا جس میں بتایا گیا کہ ایران نے مذاکرات سے انکار کر دیا ہے۔ایرانی میڈیا نے کہاکہ ایران نے بحری محاصرے کے تسلسل کے سائے میں پاکستان وفد بھیجنے کا ابھی فیصلہ نہیں کیا ہے۔
ایک باخبر نامعلوم ذریعے نے بتایا کہ جب تک امریکی بحریہ آبنائے ہرمز کی بندش جاری رکھے گی، مزید مذاکرات نہیں ہوں گے۔تاہم اس کے باوجودایرانی نیوز ایجنسی نے اشارہ کیا کہ فریقین نے گزشتہ دنوں پاکستان کی ثالثی میں پیغامات کا تبادلہ کیا ہے۔ تسنیم نے اطلاع دی ہے کہ ایران جنگ کے دوبارہ شروع ہونے کے امکان کے لیے تیاری کر رہا ہے۔
