واشنگٹن (نیوز ڈیسک) امریکی صدر ڈونلڈ ٹرمپ نے فینکس میں ایک تقریب سے خطاب کے دوران ایک غیر متوقع بیان دے کر عالمی سطح پر توجہ حاصل کر ل
ی۔ انہوں نے کہا کہ “کل ہماری جانب سے ایک خوشگوار حیران کن پیش رفت سامنے آئے گی، مثبت تبدیلیاں آ رہی ہیں اور ایک اہم شخصیت وائٹ ہاؤس کا رخ کر رہی ہے۔”
ٹرمپ نے مزید بتایا کہ وہ ہفتے کی صبح وائٹ ہاؤس میں ایک اہم پریس کانفرنس کریں گے، جس میں ایسے شخص کو پیش کیا جائے گا جو ملک کے مفاد کے لیے کام کرے گا۔ انہوں نے اشارہ دیا کہ اس پریس کانفرنس میں ایران سے متعلق معاملات بھی زیرِ بحث آئیں گے۔اپنی گفتگو میں امریکی صدر نے پاکستان کی قیادت کا خصوصی شکریہ ادا کیا۔ ان کا کہنا تھا کہ وزیراعظم شہباز شریف اور فیلڈ مارشل عاصم منیر نے عالمی امن کے لیے نمایاں کردار ادا کیا، اور ان کی کاوشیں قابلِ تعریف ہیں۔ انہوں نے خلیجی ممالک سعودی عرب، متحدہ عرب امارات، بحرین اور قطر کا بھی ذکر کرتے ہوئے ان کی حمایت کو سراہا۔
ٹرمپ نے دعویٰ کیا کہ انہوں نے ایران اور لبنان کے حوالے سے کئی ممکنہ تنازعات کو روکا، اور اپنے دور حکومت میں امریکا کو دوبارہ مضبوط اور باوقار مقام دلایا۔ ان کا کہنا تھا کہ وہ امن کے حامی ہیں اور پاکستان و بھارت کے درمیان کشیدگی کم کر کے لاکھوں جانیں بچائیں۔
انہوں نے یہ بھی کہا کہ امریکا میں آئندہ مڈٹرم انتخابات میں کامیابی حاصل کریں گے اور پہلے سے زیادہ مضبوط پوزیشن میں آئیں گے۔ ایران کے حوالے سے بات کرتے ہوئے انہوں نے بتایا کہ آبنائے ہرمز اب مکمل طور پر کھول دی گئی ہے اور تجارتی سرگرمیاں بحال ہو چکی ہیں۔
صدر ٹرمپ کے مطابق خطے کی صورتحال میں بہتری آ رہی ہے اور ایران، امریکا کے تعاون سے آبنائے ہرمز سے بارودی سرنگیں ہٹانے کے عمل میں مصروف ہے، تاہم انہوں نے واضح کیا کہ مکمل معاہدہ ہونے تک بعض پابندیاں برقرار رہیں گی اور ایران کے ساتھ مالی لین دین نہیں کیا جائے گا۔
