اسلام آباد (نیوزڈیسک) شدید گرمی اور بجلی کی طویل لوڈشیڈنگ سے پریشان شہریوں کے لیے خوش آئند خبر سامنے آئی ہے،

کیونکہ مفت سولر پینلز کی اسکیم سے متعلق اہم اعلان کر دیا گیا ہے۔ملک کے مختلف علاقوں میں گرمی کی شدت بڑھنے کے ساتھ بجلی کی غیر اعلانیہ بندش نے عوام کو شدید مشکلات میں مبتلا کر رکھا ہے۔ ایسے حالات میں متبادل توانائی ذرائع، خصوصاً سولر سسٹم، لوگوں کی پہلی ترجیح بن چکے ہیں۔اسی تناظر میں وزیراعلیٰ پنجاب مریم نواز نے مفت سولر پینل اسکیم 2026 کے لیے درخواستوں کی آخری تاریخ میں توسیع کا اعلان کیا ہے، تاکہ زیادہ سے زیادہ شہری اس سہولت سے فائدہ اٹھا سکیں۔ اب اس اسکیم میں شامل ہونے کے خواہشمند افراد دسمبر تک اپنی درخواستیں جمع کرا سکتے ہیں۔حکومت نے بڑھتی ہوئی بجلی کی قیمتوں کے پیش نظر اس منصوبے کے لیے مختص بجٹ میں بھی اضافہ کر دیا ہے، جس کا مقصد مزید مستحق خاندانوں کو ریلیف فراہم کرنا ہے۔

اس پروگرام کے تحت صوبائی حکومت شفاف قرعہ اندازی کے ذریعے ان گھریلو صارفین کو مفت سولر سسٹم فراہم کرے گی جن کی ماہانہ بجلی کی کھپت 200 یونٹس تک ہے۔اہلیت کے لیے لائف لائن اور دیگر زمروں میں شامل وہ صارفین درخواست دے سکتے ہیں جن کا ماہانہ استعمال 200 یونٹس تک ہو، جبکہ زیادہ سے زیادہ منظور شدہ لوڈ 2 کلوواٹ تک ہونا چاہیے۔دلچسپی رکھنے والے افراد سرکاری ویب پورٹل کے ذریعے رجسٹریشن کر سکتے ہیںcmsolarscheme.punjab.gov.pk، جبکہ متبادل طور پر اپنے بجلی کے بل کا ریفرنس نمبر اور شناختی کارڈ نمبر 8800 پر بھیج کر بھی اس اسکیم میں شامل ہوا جا سکتا ہے۔