پونے (این این آئی)بھارت کے شہر پونے میں سائبر ٹھگوں نے 75 سالہ ڈاکٹر کو سرمایہ کاری کے نام پر دھوکا دے کر 12.31 کروڑ ہتھیا لیے، ملزمان نے ضعیف ڈاکٹر کو صرف 11 دن میں رقم دگنی کرنے اور بھاری منافع دلانے کا جھانسہ دیا تھا۔
بھارتی میڈیا کے مطابق فراڈ کا آغاز جنوری میں اس وقت ہوا جب ڈاکٹر کو ایک نامعلوم نمبر سے پیغام موصول ہوا، اس پیغام میں اسٹاک مارکیٹ میں سرمایہ کاری کے ذریعے غیر معمولی منافع کمانے کی پیشکش کی گئی تھی۔دلچسپی ظاہر کرنے پر متاثرہ شخص کو ایک واٹس ایپ گروپ میں شامل کیا گیا جہاں جعلی سرمایہ کاری سے متعلق منصوبے شیئر کیے جاتے رہے۔ملزمان نے ڈاکٹر کو ایک جعلی ٹریڈنگ ایپ استعمال کرنے کی ہدایت کی جو ایک معروف بین الاقوامی کمپنی سے مشابہ نام رکھتی تھی، ایپ میں سرمایہ کاری اور منافع کی جعلی تفصیلات دکھا کر اعتماد حاصل کیا گیا۔بھارتی میڈیا کے مطابق 7 مارچ سے 18 مارچ کے درمیان متاثرہ شخص نے 8 مختلف بینک اکانٹس میں مجموعی طور پر 12.31 کروڑ روپے منتقل کیے۔پولیس کے مطابق جب ڈاکٹر نے مزید رقم دینے میں ہچکچاہٹ دکھائی تو ملزمان نے مبینہ طور پر جائیداد ضبط کرنے کی دھمکیاں بھی دیں۔
بھارتی میڈیا کے مطابق تقریباً 3ماہ تک رقم منتقل کرنے کے بعد جب کوئی منافع واپس نہ ملا اور مزید رقم کا مطالبہ جاری رہا تو ڈاکٹر کو دھوکے کا احساس ہوا جس کے بعد انہوں نے سائبر پولیس اسٹیشن میں شکایت درج کروائی۔میڈیا رپورٹس کے مطابق پولیس نے مقدمہ درج کر کے ملزمان کی تلاش اور رقم کے سراغ کے لیے تحقیقات شروع کر دی ہیں۔
