اسلام آباد (نیوز ڈیسک)ایران نے خبردار کیا ہے کہ آبی راستے سے گزرنے والے تیل بردار جہاز اگر پیشگی اجازت کے بغیر آگے بڑھنے کی کوشش کریں گے تو انہیں نشانہ بنایا جا سکتا ہے۔
میڈیا رپورٹس کے مطابق ایرانی تیل، گیس اور پیٹروکیمیکل برآمد کنندگان کی تنظیم کے ترجمان حامد حسینی کا کہنا ہے کہ ایران کے لیے ضروری ہے کہ وہ اس اہم گزرگاہ میں داخل اور خارج ہونے والی تمام سرگرمیوں پر نظر رکھے، تاکہ جنگ بندی کے دوران اسے اسلحے کی ترسیل کے لیے استعمال نہ کیا جا سکے۔انہوں نے بتایا کہ ہر جہاز کو اپنی کارگو تفصیلات پہلے ای میل کے ذریعے ایرانی حکام کو فراہم کرنا ہوں گی، جس کے بعد متعلقہ ادارے ٹول فیس اور ادائیگی کے طریقہ کار سے آگاہ کریں گے۔ یہ فیس ڈیجیٹل کرنسی کے ذریعے ادا کرنا ہوگی۔
بین الاقوامی ذرائع کے مطابق ایران نے تمام آئل ٹینکرز کے لیے ایک پیغام بھی جاری کیا ہے جس میں واضح کیا گیا ہے کہ گزرنے کے لیے پیشگی اجازت لازمی ہوگی۔ اطلاعات کے مطابق تیل سے بھرے جہازوں پر فی بیرل ایک ڈالر کے حساب سے فیس عائد کی جائے گی، جبکہ خالی ٹینکرز کو بغیر فیس گزرنے کی اجازت دی جا سکتی ہے۔
