اسلام آباد (نیوز ڈیسک) ایران اور امریکا کے درمیان دو ہفتوں کی جنگ بندی کے اعلان کے بعد ایران میں عوام نے خوشی کا اظہار کرتے ہوئے سڑکوں کا رخ کر لیا۔
مختلف شہروں میں لوگ قومی پرچم اٹھائے باہر نکلے اور جوش و خروش سے نعرے لگاتے رہے۔میڈیا رپورٹس کے مطابق ان اجتماعات میں ہر عمر کے افراد شامل تھے، جن میں خواتین، بچے اور بزرگ بھی شریک تھے۔ شہریوں نے اہم مقامات کے گرد انسانی زنجیریں بنا کر یکجہتی کا مظاہرہ کیا۔اسی دوران معروف ایرانی موسیقار علی قمصری نے دماوند پاور پلانٹ کے باہر احتجاج کرتے ہوئے کہا کہ وہ امن کے لیے موسیقی کے ذریعے اپنا کردار ادا کریں گے۔ دوسری جانب عراق کے دارالحکومت بغداد میں بھی جنگ بندی کی خبر پر جشن منایا گیا، جہاں لوگ رات گئے گھروں سے باہر نکل آئے اور اس پیش رفت کو خوش آئند قرار دیا۔
یاد رہے کہ اس سے قبل جب ممکنہ کارروائی کی ڈیڈ لائن قریب آئی تھی تو ایران بھر میں تشویش کے باعث شہری سڑکوں پر نکل آئے تھے، تاہم جنگ بندی کے اعلان کے بعد فضا خوشی میں بدل گئی۔
