اسلام آباد (نیوز ڈ یسک) ایران میں گرنے والے ایک امریکی طیارے کے پائلٹ کی تلاش کے لیے انعامی رقم کا اعلان سامنے آیا ہے، جس نے صورتحال کو مزید سنجیدہ بنا دیا ہے۔

میڈیا رپورٹس کے مطابق ایرانی ذرائع کا دعویٰ ہے کہ طیارے کے عملے کے دو افراد میں سے ایک نے پیراشوٹ کے ذریعے چھلانگ لگائی اور ممکنہ طور پر ملک کے جنوبی علاقے میں کہیں اترا ہے۔ تاہم امریکی حکام کا کہنا ہے کہ پائلٹ کو بحفاظت نکال لیا گیا ہے، جبکہ عملے کا ایک اور رکن تاحال لاپتہ ہے۔ایرانی سرکاری میڈیا سے وابستہ چینلز نے شہریوں سے اپیل کی ہے کہ وہ لاپتہ پائلٹ کو تلاش کریں، اور اسے زندہ گرفتار کرنے پر 66 ہزار ڈالر انعام دینے کا اعلان بھی کیا گیا ہے۔

سوشل میڈیا پر کچھ ویڈیوز بھی زیر گردش ہیں جن میں مبینہ طور پر جنوبی علاقوں میں مسلح افراد کو امریکی عملے کے رکن کی تلاش کرتے دیکھا جا سکتا ہے۔ خوزستان سے منسوب ایک غیر مصدقہ ویڈیو میں چند افراد ہتھیاروں اور قومی پرچم کے ساتھ تلاش میں مصروف دکھائی دیتے ہیں، جبکہ ایک شخص پائلٹ کو ڈھونڈنے کے عزم کا اظہار کر رہا ہے۔