اسلام آباد (نیوز ڈ یسک) چین نے پاکستان سے مطالبہ کیا ہے کہ یونائیٹڈ انرجی پاکستان (یو ای پی) کے ذمے واجب الادا تقریباً 22 کروڑ ڈالر کی رقم کی جلد ادائیگی کو یقینی بنایا جائے۔
حکام کے مطابق یو ای پی دراصل چینی کمپنی یونائیٹڈ انرجی گروپ کی ذیلی شاخ ہے۔میڈیا رپورٹس کے مطابق بیجنگ میں تعینات پاکستانی سفیر نے ایک ہنگامی مراسلہ ارسال کیا ہے، جس میں اس معاملے کی سنگینی کو اجاگر کیا گیا۔ ذرائع کے مطابق یہ رقم یو ای پی کی جانب سے سوئی سدرن گیس کمپنی کو فراہم کی جانے والی گیس کے بدلے واجب الادا ہے، اور اس وقت کمپنی روزانہ 26 سے 27 کروڑ مکعب فٹ گیس فراہم کر رہی ہے۔اطلاعات یہ بھی ہیں کہ مالی مشکلات کے باعث یو ای پی نے حالیہ دنوں میں اپنے عملے میں کمی کی ہے۔ دوسری جانب سوئی سدرن گیس کمپنی کا مؤقف ہے کہ اس کے اربوں روپے کے ریفنڈز فیڈرل بورڈ آف ریونیو کے پاس رکے ہوئے ہیں، اور جب تک یہ رقم ادا نہیں ہوتی، وہ یو ای پی کو ادائیگی کرنے کی پوزیشن میں نہیں۔
یاد رہے کہ یو ای پی نے 2011 میں برٹش پٹرولیم پاکستان کے اثاثے خرید کر اپنے آپریشنز کا دائرہ بڑھایا تھا۔ بعد ازاں 2012 میں کمپنی کو چین ڈیولپمنٹ بینک کی جانب سے 5 ارب ڈالر کی کریڈٹ سہولت بھی فراہم کی گئی، جس کا مقصد پاکستان میں سرمایہ کاری اور کاروباری سرگرمیوں کو وسعت دینا تھا۔
