اسلام آباد ۰نیوز ڈ یسک) چاغی کی ضلعی انتظامیہ نے اہم فیصلہ کرتے ہوئے ایران آمد و رفت کے لیے استعمال ہونے والا ’’راہداری سسٹم‘‘ یکم اپریل سے معطل کرنے کا اعلان کر دیا ہے۔
اس حوالے سے باضابطہ نوٹیفکیشن بھی جاری کر دیا گیا ہے۔ڈپٹی کمشنر آفس کی جانب سے جاری اعلامیے میں کہا گیا ہے کہ یہ نظام تاحکمِ ثانی بند رہے گا اور اب کسی بھی شہری کو ایران جانے کے لیے راہداری جاری نہیں کی جائے گی۔حکام کے مطابق اس سہولت کے تحت سرحدی علاقوں کے رہائشی بغیر پاسپورٹ اور ویزا کے پاکستان اور ایران کے درمیان سفر کر سکتے تھے، تاہم یہ سہولت صرف بارڈر ایریاز کے مکینوں تک محدود تھی۔اعلامیے میں محکمہ داخلہ کے احکامات کا حوالہ دیتے ہوئے بتایا گیا کہ 15 روزہ راہداری، جس کے ذریعے لوگ اپنے رشتہ داروں سے ملنے جاتے تھے، یکم اپریل 2026 سے فوری طور پر ختم کر دی گئی ہے۔ اب ایران جانے کے لیے صرف پاسپورٹ اور ویزا لازمی ہوگا۔
اس سے قبل گوادر کی ضلعی انتظامیہ بھی اسی نوعیت کا فیصلہ کر چکی ہے، جہاں اسسٹنٹ کمشنر آفس نے راہداری نظام کو غیر معینہ مدت کے لیے معطل کرنے کا نوٹیفکیشن جاری کیا تھا۔یاد رہے کہ یہ نظام کافی عرصے سے سرحدی علاقوں کے لوگوں کے لیے ایک آسان اور سہل سفری ذریعہ سمجھا جاتا تھا، جس کی معطلی سے مقامی آبادی کو مشکلات کا سامنا ہو سکتا ہے۔
