اسلا م آباد (نیوز ڈ یسک) امریکا کے صدر ڈونلڈ ٹرمپ نے پاکستان کے نائب وزیر اعظم و وزیر خارجہ اسحاق ڈار کا ایک اہم سوشل میڈیا پیغام شیئر کیا،
جس کے بعد یہ معاملہ عالمی توجہ کا مرکز بن گیا۔اسحاق ڈار نے ایکس پر جاری اپنے بیان میں بتایا کہ ایران نے پاکستانی پرچم بردار مزید 20 جہازوں کو آبنائے ہرمز سے گزرنے کی اجازت دے دی ہے، جس کے تحت روزانہ دو جہاز اس راستے سے گزر سکیں گے۔ انہوں نے اس اقدام کو مثبت اور تعمیری قرار دیتے ہوئے کہا کہ یہ خطے میں امن اور استحکام کے لیے ایک خوش آئند پیش رفت ہے۔انہوں نے مزید کہا کہ اس نوعیت کے اقدامات باہمی اعتماد کو فروغ دیتے ہیں اور سفارت کاری کے ذریعے مسائل کے حل کی جانب اہم قدم ثابت ہوتے ہیں۔ ان کے بقول مکالمہ اور تعاون ہی آگے بڑھنے کا مؤثر ذریعہ ہیں۔ماہرین کے مطابق یہ پیش رفت ایسے وقت میں سامنے آئی ہے جب ایران اور امریکا کے درمیان کشیدگی برقرار ہے، اور آبنائے ہرمز عالمی سطح پر تیل کی ترسیل کا نہایت اہم راستہ تصور کیا جاتا ہے۔ حالیہ حالات میں اس گزرگاہ پر سخت نگرانی کے باعث عالمی تجارت اور توانائی کی سپلائی متاثر ہو رہی تھی۔
تجزیہ کاروں کا کہنا ہے کہ امریکی صدر کی جانب سے اس پیغام کو شیئر کرنا اس بات کی عکاسی کرتا ہے کہ پاکستان خطے میں ایک فعال سفارتی کردار ادا کر رہا ہے اور ایران کے ساتھ روابط کو بہتر بنانے میں معاون ہے۔ ان کے مطابق اس پیش رفت سے نہ صرف پاکستان بلکہ پورے خطے میں تجارتی سرگرمیوں کو فروغ ملنے کی توقع ہے۔یاد رہے کہ ڈونلڈ ٹرمپ اس سے قبل وزیراعظم شہباز شریف کے ایک پیغام کو بھی شیئر کر چکے ہیں، جس میں اسلام آباد میں ہونے والے مذاکرات کا خیرمقدم کیا گیا تھا۔
