اسلام آباد (نیوز ڈیسک) ایرانی میزائل حملوں کے بعد تل ابیب کے آسمان پر کوؤں کے بڑے جھنڈ کی موجودگی کی ویڈیو سوشل میڈیا پر وائرل ہو گئی، جس نے مختلف قسم کی قیاس آرائیوں کو جنم دے دیا۔
اسرائیل میں حالیہ حملوں کے بعد پہلے ہی کشیدگی پائی جا رہی ہے، اور اسی پس منظر میں کچھ صارفین نے پرندوں کے اس غیر معمولی منظر کو کسی بڑے واقعے یا تباہی کی علامت قرار دیا۔ بعض حلقوں نے اس صورتحال کو قدیم روایات، خصوصاً رومی عقائد سے بھی جوڑا، جہاں پرندوں کی غیر معمولی حرکات کو سلطنتوں کے زوال سے تعبیر کیا جاتا تھا۔تاہم ماہرین ماحولیات نے ان دعوؤں کو مسترد کرتے ہوئے کہا ہے کہ عوام کو ایسی باتوں پر توجہ دینے کے بجائے حقیقت پسندانہ رویہ اپنانا چاہیے۔ ان کے مطابق اس وقت موسمِ بہار کے باعث پرندوں کی ہجرت اپنے عروج پر ہوتی ہے، جس کی وجہ سے ایسے مناظر عام ہیں۔
اگرچہ سوشل میڈیا پر بعض افراد اسے بدشگونی سے تعبیر کر رہے ہیں، لیکن سائنس دانوں کا کہنا ہے کہ کوے محض اپنے فطری معمول کے مطابق نقل مکانی کر رہے ہیں اور اس کا انسانی حالات یا کسی غیر معمولی واقعے سے کوئی تعلق نہیں۔
