اسلام آباد (نیوز ڈیسک): بنگلا دیش میں ایک المناک حادثے کے نتیجے میں کم از کم 24 افراد جان کی بازی ہار گئے، جب ایک مسافر بس دریا میں جا گری۔

غیر ملکی میڈیا رپورٹس کے مطابق یہ واقعہ دریائے پدما کے قریب اُس وقت پیش آیا جب تقریباً 40 افراد کو لے جانے والی بس دولتدیا کے مقام پر فیری کے قریب پہنچتے ہوئے بے قابو ہو کر پانی میں جا گری۔ریسکیو حکام کے مطابق غوطہ خوروں نے ڈوبی ہوئی بس سے 22 افراد کی لاشیں نکال لی ہیں، جن میں مرد، خواتین اور بچے شامل ہیں۔ ایک اہلکار کے مطابق دو خواتین کو زندہ نکالا گیا تھا، تاہم وہ بعد میں زخموں کی تاب نہ لاتے ہوئے دم توڑ گئیں، جس کے بعد اموات کی تعداد 24 ہو گئی۔امدادی کارروائیوں میں فائر سروس کے متعدد یونٹس اور درجن بھر کے قریب غوطہ خور حصہ لے رہے ہیں، جبکہ فوج، پولیس، کوسٹ گارڈ اور مقامی انتظامیہ بھی ریسکیو آپریشن میں مصروف ہیں۔ حکام نے خدشہ ظاہر کیا ہے کہ مزید افراد بھی لاپتہ ہو سکتے ہیں، جن کی تلاش جاری ہے۔