اسلام آباد(نیوز ڈیسک)امریکا نے بھارت کو روس سے خام تیل خریدنے کے لیے محدود مدت کی رعایت دے دی ہے۔

یہ اجازت ایک ماہ کے لیے دی گئی ہے اور اس کا مقصد عالمی تیل مارکیٹ میں بڑھتے دباؤ کو کم کرنا ہے، جو ایران سے متعلق جاری کشیدگی کے باعث پیدا ہوا ہے۔امریکی حکام کے مطابق بھارت کو دی جانے والی یہ چھوٹ 30 دن کے لیے مؤثر ہوگی، جس کے دوران وہ روسی خام تیل کی مخصوص کھیپ خرید سکے گا۔امریکی محکمہ خزانہ کے سربراہ اسکاٹ بیسنٹ کا کہنا ہے کہ یہ رعایت صرف اس روسی تیل تک محدود ہے جو اس وقت سمندر میں موجود ٹینکروں میں ہے۔

ان کے مطابق اس فیصلے سے روس کو نمایاں مالی فائدہ حاصل نہیں ہوگا۔ادھر خبر رساں ادارے رائٹرز کی رپورٹ کے مطابق امریکی حکومت کے دو اعلیٰ عہدے داروں نے بتایا ہے کہ واشنگٹن نے روس کے توانائی کے شعبے پر عائد پابندیوں کے باوجود بعض مخصوص ترسیلات کو مکمل کرنے کے لیے 30 روزہ عارضی اجازت دی ہے۔ اس اقدام کا مقصد پہلے سے جاری ترسیلات کو منظم انداز میں مکمل کرنا ہے۔