اسلام آباد(نیوز ڈیسک)کویت کی وزارتِ دفاع نے اعلان کیا ہے کہ آج صبح چند امریکی فوجی طیارے حادثے کا شکار ہو کر گر گئے۔

وزارتِ دفاع کے ترجمان نے سوشل میڈیا پر جاری بیان میں واقعے کی تصدیق کرتے ہوئے بتایا کہ متعدد امریکی طیارے تباہ ہوئے ہیں، تاہم حادثے کی وجوہات کے بارے میں کوئی تفصیل فراہم نہیں کی گئی۔ ان کا کہنا تھا کہ تمام عملہ محفوظ ہے اور فوری طور پر ریسکیو آپریشن شروع کر دیا گیا تھا۔ اہلکاروں کو نکال کر اسپتال منتقل کیا گیا جہاں ان کا طبی معائنہ کیا جا رہا ہے اور ضروری علاج مہیا کیا جا رہا ہے۔اس سے قبل روسی ذرائع ابلاغ نے اطلاع دی تھی کہ کویت میں ایک امریکی ایف 15 لڑاکا طیارہ گر کر تباہ ہوا، تاہم اس کا پائلٹ بروقت ایجیکٹ کرنے میں کامیاب رہا۔ سوشل میڈیا پر گردش کرنے والی ویڈیوز میں طیارے کو آگ کی لپیٹ میں گرتے دیکھا جا سکتا ہے۔

روسی میڈیا کے مطابق پائلٹ کو زخمی حالت میں اسپتال منتقل کیا گیا۔یہ پیش رفت ایسے وقت سامنے آئی ہے جب گزشتہ ہفتے امریکا اور اسرائیل کی جانب سے ایران پر حملوں کے بعد ایران نے کویت سمیت خلیجی ممالک میں موجود امریکی فوجی تنصیبات کو نشانہ بنانے کا دعویٰ کیا تھا۔ ایرانی فوج کے بیان میں کہا گیا تھا کہ کویت میں واقع امریکی اڈے کو مکمل طور پر غیر فعال بنا دیا گیا ہے۔