اسلام آباد (نیوز ڈیسک) — امریکی صدر ڈونلڈ ٹرمپ نے ایران کے خلاف جاری فوجی کارروائی کے حوالے سے دعویٰ کیا ہے کہ اس آپریشن میں 48 اہم ایرانی شخصیات کو نشانہ بنایا گیا ہے۔

ٹائمز آف اسرائیل کی ایک رپورٹ کے مطابق ٹرمپ کا کہنا تھا کہ امریکا اور اسرائیل کی مشترکہ کارروائیوں کے نتیجے میں 48 ایرانی رہنما ہلاک ہو چکے ہیں۔ انہوں نے فاکس نیوز کو دیے گئے انٹرویو میں اس دعوے کو دہراتے ہوئے کہا کہ حاصل ہونے والی کامیابی غیر معمولی ہے اور ایک ہی حملے میں درجنوں رہنماؤں کو ختم کر دیا گیا، جبکہ آپریشن تیزی سے آگے بڑھ رہا ہے۔ سی این بی سی سے گفتگو کرتے ہوئے امریکی صدر نے یہ بھی کہا کہ ایران میں جاری امریکی کارروائی متوقع وقت سے پہلے مکمل ہوتی دکھائی دے رہی ہے۔

ادھر روئٹرز کے مطابق اتوار کے روز ٹرمپ نے خبردار کیا کہ اگر ایران نے امریکی حملوں کے جواب میں کوئی کارروائی کی تو امریکا اس کا جواب ایسی شدت سے دے گا جس کی ماضی میں مثال نہیں ملتی۔

ٹرمپ نے اپنے سوشل میڈیا پلیٹ فارم “ٹرتھ سوشل” پر ایک پیغام میں کہا کہ ایران نے سخت جوابی حملے کا عندیہ دیا ہے، تاہم ان کے بقول اگر ایسا کیا گیا تو امریکا اس کے ردعمل میں غیر معمولی طاقت استعمال کرے گا۔