اسلام آباد (نیوز ڈ یسک) ایران پر امریکا اور اسرائیل کے حالیہ حملوں کے خلاف کراچی میں شدید احتجاج دیکھنے میں آیا،
جہاں مظاہرین نے امریکی قونصل خانے کی جانب بڑھنے کی کوشش کی۔ اس دوران سیکیورٹی فورسز اور مظاہرین کے درمیان جھڑپیں ہوئیں جن میں متعدد افراد جان سے ہاتھ دھو بیٹھے۔پولیس حکام کے مطابق مشتعل مظاہرین نے قونصل خانے پر پتھراؤ کیا، جس کے بعد پولیس اور رینجرز نے صورتحال پر قابو پانے کے لیے آنسو گیس کی شیلنگ کی اور ہجوم کو منتشر کرنے کی کوشش کی۔ریسکیو ذرائع کا کہنا ہے کہ قونصل خانے کے اطراف ہونے والی جھڑپوں میں ہلاکتوں کی تعداد 9 تک پہنچ گئی ہے۔ سول اسپتال کے ٹراما سینٹر میں 8 لاشیں منتقل کی گئی ہیں جبکہ کم از کم 24 زخمیوں کو طبی امداد کے لیے لایا گیا۔ زخمیوں میں سے بعض افراد فائرنگ، لاٹھی چارج اور بھگدڑ کے باعث متاثر ہوئے۔
احتجاج کے باعث شہر میں ٹریفک کا نظام بھی شدید متاثر ہوا۔ ٹریفک پولیس کے مطابق سلطان آباد سے مائی کولاچی جانے والی شاہراہ کو بند کر دیا گیا ہے اور اطراف کی سڑکوں پر آمد و رفت معطل رہی۔ بوٹ بیسن سے آنے والی گاڑیوں کو مائی کولاچی پھاٹک سے واپس موڑا جا رہا ہے جبکہ پی آئی ڈی سی کی سمت سے آنے والی ٹریفک کو پارک کٹ سے یوٹرن دے کر بھیجا جا رہا ہے۔
