اسلام آباد (نیوز ڈیسک) ایک بین الاقوامی خبر ایجنسی نے دعویٰ کیا ہے کہ ایران پر حالیہ اسرائیلی حملوں میں ملک کی دو اعلیٰ شخصیات جاں بحق ہو گئی ہیں۔

میڈیا رپورٹس کے مطابق ان حملوں میں ایرانی وزیر دفاع امیر نصیر زادہ اور پاسدارانِ انقلاب کے سربراہ محمد پاکپور کی شہادت کی اطلاعات سامنے آئی ہیں۔ برطانوی خبر رساں ادارے نے دو ذرائع اور ایک علاقائی ذریعے کا حوالہ دیتے ہوئے بتایا کہ یہ ہلاکتیں اسرائیلی فوجی کارروائیوں کے نتیجے میں ہوئیں، تاہم اب تک اس حوالے سے کوئی سرکاری تصدیق جاری نہیں کی گئی۔

یاد رہے کہ امریکا اور اسرائیل کی جانب سے ایران میں مختلف اہداف کو نشانہ بنانے کے بعد خطے میں کشیدگی میں اضافہ ہوا ہے، اور ان حملوں میں پاسدارانِ انقلاب کے متعدد سینئر کمانڈرز اور سیاسی شخصیات کے جاں بحق ہونے کی اطلاعات بھی سامنے آئی ہیں۔

ایران نے ان کارروائیوں کے جواب میں اپنی جوابی مہم کو ’’آپریشن وعدہ صادق 4‘‘ کا نام دیا ہے۔ ایرانی پاسدارانِ انقلاب کے مطابق اس آپریشن کے دوران خطے میں موجود کئی امریکی فوجی تنصیبات کو ہدف بنایا گیا، جن میں بحرین میں قائم امریکی بحریہ کے ففتھ فلیٹ کا مرکز بھی شامل بتایا گیا ہے۔

ایرانی سرکاری میڈیا کا کہنا ہے کہ بحرین، قطر اور متحدہ عرب امارات میں موجود امریکی اڈوں کے علاوہ مقبوضہ فلسطینی علاقوں میں واقع بعض فوجی اہداف کو بھی نشانہ بنایا گیا۔ پاسدارانِ انقلاب نے بیان میں کہا ہے کہ یہ کارروائیاں امریکی فوج اور اسرائیلی حکومت کے خلاف کی جا رہی ہیں، اور میزائل و ڈرون حملوں کا سلسلہ جاری رکھنے کا عزم ظاہر کیا گیا ہے۔