اسلام آباد (نیوز ڈیسک) بھارت کی وزارتِ خارجہ نے ایران میں مقیم اپنے شہریوں کو ہدایت دی ہے کہ وہ موجودہ حالات کے پیش نظر جلد از جلد ملک چھوڑ دیں۔
غیر ملکی میڈیا رپورٹس کے مطابق یہ انتباہ خطے میں بڑھتی ہوئی کشیدگی اور امریکا کے ممکنہ فوجی اقدام کے خدشات کے باعث جاری کیا گیا ہے۔ تہران میں قائم تہران میں بھارتی سفارتخانے نے سوشل میڈیا پیغام میں کہا کہ جو بھارتی شہری اس وقت ایران میں موجود ہیں وہ دستیاب ذرائع، خصوصاً کمرشل پروازوں کے ذریعے فوری واپسی کا انتظام کریں۔حکام کے اندازوں کے مطابق عام حالات میں تقریباً دس ہزار بھارتی شہری ایران میں قیام پذیر ہوتے ہیں۔ سفارتخانے نے شہریوں اور بھارتی نژاد افراد کو احتیاط برتنے، احتجاجی مقامات سے دور رہنے، مقامی حکام کی ہدایات پر عمل کرنے اور سفارتخانے سے مسلسل رابطے میں رہنے کی تاکید کی ہے۔
یہ ہدایت ایسے موقع پر سامنے آئی ہے جب بھارتی وزیر اعظم نریندر مودی بدھ کو اسرائیل کے دورے پر روانہ ہونے والے ہیں۔ اسرائیلی وزیر اعظم بنیامین نیتن یاہو کا کہنا ہے کہ مودی کا یہ دورہ مبینہ طور پر مشترکہ دشمنوں کے خلاف تعاون کو مضبوط بنانے میں مددگار ثابت ہوگا۔
