ریاض(این این آئی)سعودی عرب میں نگرانی اور انسداد بدعنوانی اتھارٹی نزاہہ نے مارچ کے مہینے کے دوران 239 ملزموں سے متعدد فوجداری اور انتظامی مقدمات میں تفتیش کی ۔ ان مقدمات میں رشوت خوری، اختیارات کا غلط استعمال، جعلسازی اور منی لانڈرنگ کے جرائم شامل تھے۔غیرملکی خبررساں ادارے کے مطابق وزارت داخلہ اور دفاع سمیت آٹھ سرکاری اداروں میں کام کرنے والے 146 مدعا علیہان کی گرفتاری عمل میں لائی گئی۔

وزارتِ انصاف، وزارتِ نیشنل گارڈ، تعلیم، صحت، میونسپلٹی و دیہی امور اور زکو و ٹیکس کے محکموں کے ملازمین بھی گرفتار ہونے والوں میں شامل تھے۔ساتھ ہی نزاہہ نے گرفتار کیے گئے متعدد افراد کو رہا بھی کر دیا۔انہیں ضمانت داروں کی ضمانت پر رہا کیا گیا۔ نزاہہ نے ایک بیان جاری کیا اور بتایا کہ مارچ 2024 کے دوران سلامتی کے تحفظ، شفافیت کے اصول کی پاسداری اور مالی اور انتظامی بدعنوانی سے نمٹنے کے لیے لگ بھگ 1657 واقعات کی نگرانی کی گئی۔ گزشتہ ماہ نزاہہ نے 3,209 نگرانی کی کارروائیاں کرکے 288 مشتبہ افراد سے تفتیش کی تھی۔