کراچی(این این آئی)وفاقی تحقیقاتی ادارے ایف آئی اے کے اینٹی ہیومن ٹریفکنگ سرکل کراچی نے 2 الگ الگ کارروائیوں کے دوران شہریوں کو جعلی ویزوں پر بیرونِ ملک بھجوانے والے 2 ملزمان کو گرفتار کر لیا۔ڈپٹی ڈائریکٹر بہاول اوستو کے مطابق انسانی اسمگلروں کے خلاف جاری کریک ڈاون میں 2 ملزمان کو گرفتار کیا گیا ہے۔ملزمان کی گرفتاری کراچی کے اولڈ سٹی ایریا کی جنریٹر مارکیٹ سے عمل میں آئی ہے۔ترجمان ایف آئی اے کے مطابق گرفتار ملزمان میں شیث احمد اور سعدی احمد شامل ہیں۔ملزمان بیرونِ ملک ملازمت کے نام پر جعلی ویزے فروخت کرنے میں ملوث تھے۔ملزم شیث احمد ریکارڈ یافتہ ملزم ہے، جس کے خلاف اس سے پہلے بھی مقدمہ درج تھا۔ملزمان اٹالین ایمبیسی کی جعلی دستاویزات بنانے میں بھی ملوث تھے۔ترجمان ایف آئی اے کے مطابق ملزمان نے شہریوں سے اٹلی کے ورک پرمٹ کے نام پر لاکھوں روپے بٹورے ہیں۔ملزمان کے خلاف مقدمات درج کر کے تفتیش کا آغاز کر دیا گیا ہے۔