واشنگٹن(این این آئی)امریکی خفیہ ایجنسی سی آئی اے نے سماجی رابطے کی ویب سائٹ ٹیلی گرام چینل لانچ کیا ہے جس کا مقصد روسی شہریوں کو جاسوسی کیلیے بھرتی کرنا ہے۔
غیرملکی خبررساں ادارے کے مطابق ٹیلی گرام پر روسی زبان میں ایک ویڈیو پوسٹ کی گئی جس میں ایک خاتون اور مرد اپنی بیوروکریسی کی ملازمت سے پریشان ہیں اور سوال کر رہے ہیں کہ کیا ہم نے اس زندگی کا خواب دیکھا تھا؟ویڈیو ختم ہونے کے بعد ایک پیغام نظر آتا ہے کہ سی آئی اے روس کے متعلق سچائی جاننا چاہتی ہے اور ہمیں ایسے بااعتماد افراد کی ضرورت ہے جو سچ جانتے ہیں اور ہمیں بتا سکتے ہیں۔پیغام میں واضح لکھا ہے کہ کیا آپ فوجی افسر ہیں؟ کیا آپ انٹیلیجنس، سفارتکاری، سائنس، اعلی ٹیکنالوجی کے شعبوں سے منسلک ہیں یا ان شعبوں میں کام کرنے والے افراد کو جانتے ہیں؟پیغام میں مزید کہا گیا کہ کیا آپ کے پاس روس کی معیشت یا اعلی رہنمائوں سے متعلق معلومات ہیں؟ تو ہم سے رابطہ کریں۔یہ ویڈیو سی آئی اے کے دیگر سوشل میڈیا اکائونٹس بشمول یوٹیوب، ٹوئٹر، انسٹاگرام اور فیس بک پر بھی پوسٹ کی جا رہی ہے۔
