ماسکو(این این آئی)مغربی روس میں لڑاکا طیارے کے رہائشی عمارت سے ٹکرانے سے 13 افراد ہلاک ہوگئے، اس کے نتیجے میں کئی اپارٹمنٹس شعلوں کی لپیٹ میں آگئے ۔روسی خبر رساں ادارے کے مطابق دونوں پائلٹس طیارے سے نکل جانے میں کامیاب ہوگئے ،

مقامی گورنر وینیامین کوندراتیف نے کہا کہ حادثے کا شکار ہونے والا طیارہ سخوئی ایس یو34تھا۔یہ ایک سپرسونک درمیانے فاصلے تک مار کرنے والا لڑاکا بمبار تھا۔یہ طیارہ ایک فوجی ہوائی اڈے سے اڑان بھرنے کے بعد تربیتی پرواز کے دوران میں گرکر تباہ ہوا ، طیارے کو حادثہ انجن میں آگ لگنے کی وجہ سے پیش آیا،سنگین جرائم سے نمٹنے والی روس کی ریاستی تحقیقاتی کمیٹی نے کہا کہ اس نے ایک فوجداری مقدمے کا آغازکردیااور تفتیش کاروں کو جائے وقوعہ پر بھیجاگیاہے تاہم اس نے یہ نہیں بتایا کہ کون سے شواہد نے حادثے میں ممکنہ غلط کاری کی نشان دہی کی ہے۔کریملن کے حوالے سے یہ اطلاع دی گئی کہ صدر ولادی میرپوتین کو اس حادثے سے آگاہ کر دیا گیا ہے اورانھوں نے متاثرین کو تمام ضروری مددمہیا کرنے کا حکم دیا ہے۔اس میں کہا گیا ہے کہ صحت اور ہنگامی صورت حال کے وزرا کو خطے کی جانب روانہ ہونے کا حکم دیا گیا ہے۔