کابل(این این آئی)افغانستان میں طالبان حکومت کے ایک سال مکمل ہونے کی خوشی میں عام تعطیل کی گئی ہے۔میڈیارپورٹس کے مطابق طالبان نے گزشتہ برس 15 اگست کو افغانستان میں اپنی حکومت کے قیام کا اعلان کیا تھا۔ فغانستان میں طالبان امیر کی جانب سے نامزد کردہ عبوری کابینہ امور مملکت چلا رہی ہے
اور تاحال خواتین کی ملازمتوں اور لڑکیوں کی تعلیم پر پابندی عائد ہے جبکہ ابھی تک کسی ملک نے طالبان حکومت کو تسلیم نہیں کیا ہے۔طالبان افغانستان میں 1990 کے عشرے میں منظر عام پر آئے، طالبان تحریک کا آغاز 1994 میں اس وقت ہوا، جب ڈاکٹر نجیب کی حکومت ختم ہونے کے بعد افغان مجاہدین خانہ جنگی کا شکار تھے۔طالبان کی قیادت ملا محمد عمر کے پاس تھی، 27 ستمبر 1996 کو کمانڈر احمد شاہ مسعود اپنی فوجوں کو کابل سے وادی پنج شیر لے گئے، جس کے بعد طالبان فوجوں نے کابل پر قبضہ کیا۔1998 میں عبدالرشید دوستم کی ملیشیا کی زبردست مزاحمت کا سامنا کرنا پڑا، تاہم اس کے بعد طالبان نے مزار شریف پر بھی قبضہ کیا۔
