کراچی(این این آئی)آئندہ ماہ شروع ہونے والے مقدس رمضان المبارک کے مہینے میں ایک مرتبہ پھر لاکھوں پاکستانی عمرے کی سعادت حاصل کرنے کے لیے سعودی عرب نہیں جا سکیں گے۔سعودی عرب کی جانب سے پاکستان سمیت دیگر 200 ممالک سے آنے والے مسافروں کے داخلے پر پابندی عائد کردی گئی ہے۔سرکاری اعداد و شمار کے مطابق پاکستان سے 2019 میں
جانے والے عمرہ زائرین کی تعداد 20 لاکھ سے زائد تھی جب کہ 2018 میں یہ تعداد 17 لاکھ کے قریب تھی۔عالمی وبا قرار دیئے جانے والے کورونا وائرس کے سبب پروازوں پر لگنے والی پابندیوں کے نتیجے میں گزشتہ ایک سال کے دوران پاکستان سے جانے والے عمرہ زائرین کی تعداد نہایت محدود رہی ہے۔اس ضمن میںٹریول ایجنٹ سکندر اعظم نے بتایاکہ پورا سال پاکستان سے لوگ عمرے کی ادائیگی کے لیے سعودی عرب جاتے ہیں لیکن رمضان المبارک کے دوران اس تعداد میں تقریباً60فیصد تک اضافہ ہو جاتا ہے۔سعودی عرب کی جانب سے پہلے 27 فروری 2020 کو غیر ملکی عمرہ زائرین کے داخلے پر عارضی پابندی عائد کی گئی تھی جس کے بعد نومبر 2020 سے کورونا ایس او پیز کے ساتھ محدود پرغیر ملکی عمرہ زائرین کو ملک میں میں داخلے کی اجازت دی گئی تھی۔انہوں نے بتایاکہ تین فروری 2021 سے سعودی عرب کے حکام نے کورونا کیسز میں اضافے کے باعث ایک مرتبہ پھر پاکستان سمیت 20 ممالک سے آنے والے زائرین پر پابندی عائد کر دی ہے جس میں 17 مئی تک توسیع کی جا چکی ہے۔
