واشنگٹن (اے ایف پی)سماجی رابطے کی ویب سائٹ ٹوئٹر نے کہا ہے کہ صدر ڈونلڈ ٹرمپ اگر الیکشن میں ہار تسلیم نہیں کرتے تو وہ حلف برداری کے روز صدارتی ٹوئٹر ہینڈل کا اکائونٹ نو منتخب صدر جو بائیڈن کو دے دیں گے۔پوٹس (POTUS) کا اکائونٹ امریکی صدر کا آفیشل ٹوئٹر
اکائونٹ ہوتا ہے۔اے ایف پی کے مطابق ٹوئٹر کے ترجمان نک پیچیلو نے ایک ای میل کے ذریعے پولیٹکو کو بتایا ہے کہ ٹوئٹر وائٹ ہاوس کے انسٹیٹیوشنل اکائونٹس کی منتقلی کے لیے تیاری کر رہا ہے۔انہوں نے کہا کہ یہ عمل قومی آرکائیوز کے مشورے سے کیا جا رہا ہے، ایسا 2017 میں بھی ہوا تھا۔صدر کے علاوہ خاتون اول اور پریس سیکریٹری کے اکائونٹس سمیت وائٹ ہاوس کے مزید اکائونٹس کی بھی منتقلی ہوگی۔ٹوئٹر کی جانب سے وائٹ ہائوس اکاونٹس کو ریسیٹ کیا جائے گا۔امریکی صدر ڈونلڈ ٹرمپ جنہوں نے ابھی تک تین نومبر کے انتخابات کے نتائج کو تسلیم نہیں کیا ہے۔امریکی صدر کے ذاتی اکائونٹ پر آٹھ کروڑ 80 لاکھ فالورز ہیں جبکہ ان کے آفیشل اکائونٹ پر تین کروڑ 20 لاکھ فالورز ہیں۔پوٹس کا اکائونٹ بڑے پیمانے پر صدر کے ذاتی اکائونٹ کے ساتھ ساتھ وائٹ ہائوس کے دیگر اکائونٹس کو بھی ریٹویٹ کرتا ہے۔امریکی نو منتخب صدر جو بائیڈن آئندہ ہفتے تک اپنی کابینہ کے اہم ارکان کا اعلان کر سکتے ہیں۔
ڈیموکریٹ جو بائیڈن نے واشنگٹن میں صحافیوں کو بتایا کہ انہوں نے وزارت خزانہ کی سربراہی کے لیے پہلے ہی فیصلہ کر رکھا ہے۔ اطلاعات کے مطابق بائیڈن وزیر خارجہ سمیت دیگر اہم عہدوں کے لیے بہت جلد نام تجویز کرنے والے ہیں۔ جو بائیڈن آئندہ برس 20 جنوری کو امریکی صدر کے طور پر حلف اٹھائیں گے۔
