سرینگر(این این آئی)غیر قانونی طور پر بھارت کے زیر قبضہ جموںوکشمیر میں کشمیریوں کی جاری آزادی جدوجہد کو دبانے کیلئے ہر طرح کے ظلم و تشدد کے استعمال کے باوجود یہ ایک واضح حقیقت ہے کہ شکست مودی کی زیر قیادت بھارت کی فسطائی حکومت کا حتمی مقدر ہے ۔ کشمیرمیڈیاسروس کی طرف سے جاری ایک تجزیاتی رپورٹ کے مطابق جموں وکشمیر کے بارے میں

آر ایس ایس کی حمایت یافتہ بی جے پی حکومت کی پالیسیوں پر عالمی سطح پر کی جانیوالی تنقید اور اقوام متحدہ کی سلامتی کونسل میں ایک سال میں تین مرتبہ تنازعہ کشمیر پر بحث کی وجہ سے بھارت کی موجودہ حکومت کو مقامی اور بین الاقوامی دونوں سطح پرسخت تنقید کا نشانہ بنایا جارہا ہے ۔ بی جے پی کے سابق رہنما یشونت سنہا کی سربراہی میں بھارت کنسرن سٹیزنز گروپ نے کہا ہے کہ بھارت کے غیر قانونی زیر تسلط جموںوکشمیرمیں مودی حکومت کی پالیسیاں ناکام ثابت ہو ئی ہیں ۔ رپورٹ میں گزشتہ سال 5 اگست کے بھارت کے غیر قانونی اقدامات کے تناظر میں رونما ہونیوالی واقعات کا جائزہ لینے کے بعد یہ نتیجہ اخذ کیاگیا ہے کہ یا تو بھارت کو کشمیر کے بارے میں اپنی ہٹ دھرمی ترک کر دینی چاہیے یا پھر اسے ذلت کا سامنا کرنے کے ئے تیار رہنا چاہیے کیونکہ وہ کشمیری عوام کے جذبہ حریت کو کمزور کرنے میں کامیاب نہیں ہو سکتا ۔رپورٹ میں کہا گیا ہے کہ بھارت کی طرف سے غیر قانونی طورپر جموںوکشمیر کی خصوصی حیثیت کی منسوخی نے کشمیریوں کو مزید تنہا کردیاہے جب کہ قتل ،ظلم و تشدد اور گرفتاریوں کے ذریعے ان کا جذبہ حریت مزید مستحکم ہو ا ہے ۔ رپورٹ میں محرم کے جلوسوں میں آزادی کے حق میں اور بھارت کے خلاف زبردست نعروں کا حوالہ دیتے ہوئے بھارت سے کہاگیا ہے کہ وہ تاریخ سے سبق حاصل کرے کیونکہ وہ کشمیریوںکو قتل تو کرسکتا ہے تاہم وہ ان کے جذبہ حریت کو کمزور نہیں کرسکتا لہذا بھارت کو جموںوکشمیر میں اپنے مذموم عزائم پر عمل درآمد ترک کر دینا چاہیے ۔ رپورٹ میں مزید کہا گیا کہ نریندر مودی کیلئے کشمیریوں کا پیغام انتہائی واضح ہے کہ وہ مر جائیں گے لیکن ہتھیارنہیں ڈالیں گے اور وہ مقبوضہ علاقے میں بھارت کی سازشوں کو شکست دینے کیلئے متحد ہیں۔ رپورٹ کے مطابق مودی کی فسطائی حکومت کشمیریوںکی غیر متزلزل جدوجہد آزادی سے بوکھلاہٹ کا شکار ہو چکی ہے۔ کشمیریوںکی جدوجہد آزادی کو تاریخ میں سنہرے الفاظ میں لکھا جائے گا جبکہ بھارت کو ایک ظالم اور غاصب کے طورپر یاد رکھا جائے گا۔