مدینہ منورہ(آن لائن) مسجد نبوی الشریف میں کورونا احتیاطی تدابیر اختیار کرتے ہوئے یکم محرم سے صفیں بچھانے کاآغاز کردیاجائے گا۔ صفوں پر نمازیوں کے درمیان فاصلہ متعین کرتے ہوئے نشانات بھی لگا ئے جائیں گے۔سعودی میڈیا کے مطابق کورونا وائرس سے بچاوکیلئے مسجد نبوی الشریف کے صحنوں سے تمام صفیں اٹھا لی گئی تھیں جبکہ آنے والوں کو ہدایات جاری کی گئی تھیں کہ اپنی جائے نماز ساتھ لے کر آئیں۔ ادارہ امور مسجد نبوی الشریف کی جانب سے جاری

بیان میں کہا گیا ہے کہ یکم محرم 1442 ہجری سے مسجد نبوی کے صحنوں اور کی جانے والی توسیع کے مقامات پر صفیں حسب سابق بچھانے کے انتظامات کر لیے گئے۔بچھائی جانے والی صفوں پر ایک نمازی سے دوسرے کے درمیان کم از کم 180 سینٹی میٹر کا فاصلہ رکھا جائے گا۔ اس حوالے سے فاصلہ رکھتے ہوئے صفوں پر نشانات بھی لگائے جارہے ہیں۔انتظامیہ کا کہنا ہے کہ ابتدائی مرحلے میں 7 ہزار صفیں صحنوں اور توسیعی مقامات پر بچھائی جائیں گی۔