واشنگٹن /کابل (این این آئی)فغانستان کی قومی سلامتی کونسل کے ترجمان جاوید فیصل نے کہاہے کہ صدر اشرف غنی کے 11 مارچ کو جاری کردہ فرمان کے مطابق بگرام جیل سے طالبان قیدیوں کو رہا کیا گیا ہے۔فغانستان کی حکومت نے طالبان کے مزید 361 قیدیوں کو رہا کر دیا ہے۔ اس سے قبل حکومت نے 100 قیدیوں کو رہا کیا تھا۔میڈیارپورٹس کے مطابق افغانستان کی قومی سلامتی کونسل کے

ترجمان جاوید فیصل کے مطابق صدر اشرف غنی کے 11 مارچ کو جاری کردہ فرمان میں کہاگیاکہ بگرام جیل سے طالبان کے مزید 361 قیدیوں کو رہا کیا گیا ہے۔ترجمان کے مطابق امن کی کوششوں کے تحت ملک کی مختلف جیلوں میں قید طالبان کے 1500 قیدیوں کو رہا کیا جائے گا۔یاد رہے کہ طالبان قیدیوں کی رہائی کا باقاعدہ آغاز گزشتہ ہفتے اچانک اس وقت شروع ہوا تھا جب طالبان کے قطر آفس کے ترجمان سہیل شاہین نے افغان حکومت سے مذاکرات نہ کرنے کا اعلان کیا تھا۔سہیل شاہین کے اعلان کے اگلے روز افغان حکومت نے 100 قیدیوں کو رہا کیا بعدازاں طالبان نے بھی 20 افغان قیدیوں کی رہائی کا اعلان کیا تھا۔ادھرامریکہ کے نمائندہ خصوصی برائے افغان مفاہمت زلمے خلیل زاد نے افغان حکومت اور طالبان کی طرف سے ایک دوسرے کے قیدیوں کو رہا کرنے کے اقدام کا خیر مقدم کیا۔انہوں نے کہا کہ قیدیوں کی رہائی سے افغان امن عمل اور تشدد میں کمی کی راہ ہموار ہو گی،خلیل زاد نے پیر کو اپنے ٹوئٹ میں کہا کہ امریکہ اور طالبان کے درمیان معاہدے میں طے کیے گئے اہداف کی تکمیل کے لیے دونوں فریقین کو اپنی کوششوں کو تیز کرنا چاہیے۔خلیل زاد نے مزید کہا کہ جیلوں میں کرونا وائرس کی وبا کے پھوٹنے کا حقیقی خطرہ موجود ہے۔ اس لیے ضروری ہے کہ فریقین قیدیوں کی رہائی کی طرف تیزی سے پیش رفت کریں۔‎