واشنگٹن(این این آئی)امریکی وزیر دفاع مارک ایسپرنے کہاہے کہ تین جنوری کو بغداد کے ہوائی اڈے پر ایرانی پاسداران انقلاب کی القدس فورس کے سربراہ قاسم سلیمانی کی ہلاکت ایران کی خراب حرکتوں کا اچھا جواب تھا۔میڈیارپورٹس کے مطابق امریکی وزیر دفاع نے یہ بات جان ہوپکنز یونیورسٹی میں ایران کے حوالے سے ایک لیکچر کے دوران کہی۔ ان کا کہنا تھا کہ اسے (سلیمانی کو) لڑائی کے

میدان سے باہر نکال پھینکنا کئی برس سے جاری ایران کے برے رویے اور اس (سلیمانی) کے ذاتی افعال کا مناسب جواب تھا۔مارک ایسپر کے مطابق امریکا کو ایران اور شمالی کوریا جیسے ممالک کی طرف سے مسلسل خطرات کا سامنا ہے لہذا ان ممالک سے ہمیشہ خبردار رہنا چاہیے۔ انہوں نے مزید کہا کہ قاسم سلیمانی کے ہاتھ ہزاروں امریکیوں اور بہت سے دیگر لوگوں کے خون میں لتھڑے ہوئے تھے، اس میں ایرانی عوام کا خون بھی شامل ہے۔امریکی وزیر دفاع کے نزدیک ایران گذشتہ چالیس برسوں کے دوران مشرق وسطی میں تخریبی کارروائیوں کا ذمے دار ہے۔ انہوں نے کہا کہ ایرانی پاسداران انقلاب اور اس کی ملیشیاؤں کا نفوذ افریقا سے لے کر مشرق وسطی اور افغانستان تک پھیلا ہوا ہے .. ہم دنیا کے دیگر حصوں میں بھی ان کا وجود دیکھ سکتے ہیں۔مارک ایسپر نے زور دے کر کہا کہ اْن کا ملک خطے میں داعش کی تباہی کے واسطے اور ایران کے بْرے برتاؤ سے نمٹنے کے لیے لڑائی جاری رکھے گا۔‎

موضوعات:امریکی وزیر دفاع مارک ایسپر