کراچی (آن لائن) امریکی دارالحکومت واشنگٹن ، ڈی سی میں منعقدہ ’’ خواتین مارچ - 2020 ‘‘ "The Women March - 2020" میں شریک پاکستانی خواتین نے قوم کی بیٹی ڈاکٹر عافیہ کی رہائی کا مطالبہ کیا ہے۔ واضح رہے کہ ’’خواتین مارچ ‘‘ کے انعقاد کا مقصد خواتین کے ساتھ روا رکھی جانے والی ہر طرح کی ناانصافی کے خلاف آواز بلند کرنا اور لوگوں میں شعور اجاگر کرنا تھا۔ ’’خواتین مارچ ‘‘ میں شریک ایک خاتون ندرت صدیقی نے جو پلے کارڈ اٹھا رکھا تھا اس میں ڈاکٹر عافیہ کو سیاسی قیدی قرار دیتے ہوئے ان کی رہائی کا
مطالبہ کیا۔ان کا کہنا تھا کہ خواتین مارچ میں میرے شریک ہونے کا مقصد امریکی حکومت کی جانب سے عافیہ صدیقی اور ان جیسی دیگر مسلم خواتین سیاسی قیدیوں کی غیر قانونی اور ناجائز قید کو منظرعام پر لانا تھا۔قوم کی بیٹی ڈاکٹر عافیہ کی ہمشیرہ اور عافیہ موومنٹ کی رہنما ڈاکٹر فوزیہ صدیقی نے امریکہ میں مقیم پاکستانی خواتین کی جانب سے ڈاکٹر عافیہ کی رہائی کا مطالبہ کرنے پر ان کا شکریہ ادا کیا ہے۔ 24 جنوری ،بروز جمعہ، 3 بجے دن ’’عالمی یوم تعلیم‘‘ کے موقع پرگلوبل عافیہ موومنٹ کے زیراہتمام کراچی یونی ورسٹی سے این ای ڈی یونی ورسٹی تک ’’ایجوکیشن واک‘‘ (Education Walk) کیا جارہا ہے۔جس میں مختلف سیاسی ، دینی، سماجی اور تعلیم شعبہ سے وابستہ رہنماء شرکت کریں گے۔ ڈاکٹر فوزیہ صدیقی نے کہا ہے کہ’’ تعلیم یافتہ پاکستان‘‘ ہی پاکستان کے تمام’’ مسائل کا حل‘‘ ہے۔ انہوں نے عوام سے’’ایجوکیشن واک‘‘ میں بھرپور شرکت کی اپیل کی ہے۔