واشنگٹن (این این آئی)امریکی صدر ڈونلڈ ٹرمپ نے حامیوں کو خبردار کیا ہے کہ ہمارا ملک داؤ پر لگا ہوا ہے اور اس سے پہلے ایسا کبھی نہیں ہوا۔امریکی صدر ڈونلڈ ٹرمپ کی جانب سے سماجی رابطے کی ویب سائٹ ٹوئٹر پر جاری ویڈیو بیان ڈیموکریٹس کے قانون سازوں کی جانب سے ٹرمپ کے خلاف عائد الزامات کی تحقیقات کے ردعمل میں دیا گیا۔ویڈیو بیان میں ٹرمپ نے کہا کہ ڈیموکریٹس کی جانب سے
امریکی حقوق کو خطرہ لاحق ہے، وہ آپ کے ہتھیار، آپ کی صحت، آپ کا ووٹ اور آزادی واپس لینا چاہتے ہیں۔مختلف ٹوئٹس میں ٹرمپ نے خود پر عائد الزامات کو دہرایا اور کہا کہ مواخذے کی تحقیقات چڑیلوں کا شکار ہے۔ڈونلڈ ٹرمپ نے کہا کہ ڈیموکریٹک قانون ساز ایڈم اسکف جو مواخذے کی تحقیقات کی سربراہی کررہے ہیں انہوں نے مجھے بدنام کیا اور بہتان لگایا، انہیں کانگریس سے مستعفی ہونا چاہیے۔
