مکہ مکرمہ/مدینہ منورہ (این این آئی) ترجمان مذہبی امور نے کہاہے کہ 1 لاکھ 99 ہزار 624 پاکستانی عازمین حج سعودی عرب پہنچ چکے ہیں۔ترجمان مذہبی امور کے مطابق 1 لاکھ 22 ہزار 975 سرکاری جبکہ 76 ہزار 755 عازمینِ حج نجی حج سکیم کے ذریعے پہنچے ۔ ترجمان کے مطابق سرکاری سکیم کا حج فلائٹ آپریشن مکمل ہے ۔ ترجمان کے مطابق موسسہ جنوب ایشیا اور مکاتب کے ذریعے عازمین حج کے
مشاعر کے انتظامات مکمل کیے جا چکے ہیں ،مکاتب کی جانب سے منی کے خیمہ کارڈ رہائش گاہوں پر تقسیم کرنے کا عمل جاری رہا ۔ ترجمان کے مطابق سعودی اسلامک ڈویلپمنٹ بینک کے ذریعے عازمین حج کی قربانی کے انتظامات مکمل کر لئے گئے۔ عازمین حج کی منی روانگی کا آغاز 7 ذی الحجہ کی شام سے ہوگیا ،ترجمان نے کہاکہ عازمین حج اپنی رہائش گاہوں سے احرام باندھ کر حج کی نیت سے منی پہنچیں گے ،عازمین حج مکاتب کے زیر انتظام بسوں کے ذریعے منی جائیں گے۔ ترجمان کے مطابق 13 پاکستانی مکاتب ٹرین زون، 23 مکاتب اولڈ منی جبکہ 24 نیو منی میں واقع ہیں۔ ترجمان کے مطابق ٹرین سٹیشن کے نزدیکی 13 پاکستانی مکاتب کے 54 ہزار عازمین کو مشاعر ٹرین کی سہولت ملے گی۔ ترجما ن کے مطابق ٹرین سے دور مکاتب کے عازمین حج کی عرفات روانگی اور واپسی بسوں کے ذریعے ہو گی۔ ترجمان نے کہاکہ دفتر امور حجاج معاونین کے ذریعے مشاعر میں حجاج کرام کی رہنمائی کرے گا۔ ترجمان نے کہاکہ امسال مکاتب کے ساتھ مزید بہتر سہولیات اور تین وقت کھانے کی فراہمی کا معاہدہ کیا ہے۔ ترجمان نے کہاکہ دفتر امور حج پاکستان کی جانب سے عازمینِ حج کو ہدایات جاری کی گئیں ۔ ترجما ن کے مطابق گرم موسم کومدنظر رکھتے ہوئے عازمین حج پانی اور چھتری کا استعمال زیادہ کریں،عازمینِ حج مشاعر میں اپنے ساتھ کم سے کم سامان رکھیں۔ ترجمان کے مطابق کسی پریشانی کی صورت میں معاون حج یا مفت ہیلپ لائن 8001166622 سے مدد لیں۔
