غزہ(این این آئی)فلسطین میں اسرائیلی فوج کی زیر نگرانی نشریات پیش کرنیوالے سرکاری ریڈیو کو اسرائیلی حکومت کی جانب سے مقبوضہ بیت المقدس منتقل کئے جانے کی شدید مذمت کی جارہی ہے ۔فلسطینی وزارت اطلاعات ونشریات کی طرف سے جاری کردہ ایک بیان
میں کہا گیا ہے کہ اسرائیلی ریڈیو کا ہیڈ کوارٹر وزیر دفاع آوی گیڈور لائبرمین کی ہدایت پر مقبوضہ بیت المقدس منتقل کیا گیا ہے۔ یہ ایک اشتعال انگیز اقدام ہے جس کی جتنی مذمت کی جائے کم ہے۔فلسطینی محکمہ اطلاعات کے چیئرمین سلامہ معروف نے ایک بیان میں کہا کہ اسرائیلی سرکاری ریڈیو کا ہیڈ کواٹر مقبوضہ بیت المقدس منتقل کرنا شہر کو یہودی رنگ رنگ میں رنگنے اور القدس پر صہیونی بالادستی کے قیام کی سازشوں کا تسلسل ہے۔انہوں نے کہا کہ اسرائیلی ریڈیو کی عمارت ایک ایسے وقت میں بیت المقدس منتقل کی گئی جب دوسری جانب صہیونی ریاست کا میڈیا فلسطینیوں کے خلاف صہیونی ریاست کے جرائم کی پردہ پوشی کرنے کی پوری کوشش کر رہا ہے۔خیال رہے کہ اسرائیل کے سرکاری ریڈیو کا صدر دفتر القدس منتقل کردیا گیا ہے۔ اسرائیلی ریڈیو کی القدس منتقلی اور وہاں سے نشریات پیش کرنے کی تیاری پر عرب اور مسلمان ممالک مجرمانہ خاموشی کے مرتکب ہیں اور کسی طرف سے اس حوالے سے کوئی آواز بلند نہیں کی گئی ہے۔
