واشنگٹن(این این آئی)امریکہ نے پاکستان کی نئی حکومت سے مکمل تعاون کے ساتھ خطے میں امن و خوشحالی کیلئے مشترکہ کاوشیں کرنے کے عزم کا اظہار کیا ہے۔عالمی میڈیا کے مطابق امریکا نے پاکستان کے عام انتخابات کے نتائج کے بعد اپنے پہلے ردعمل میں تحریک انصاف کے سربراہ عمران خان کو مبارک باد دیتے ہوئے امید ظاہر کی ہے کہ خطے میں امن اور خوشحالی کے لیے دونوں ممالک مشترکہ کردار ادا کریں گے۔امریکی محکمہ خارجہ کی جانب سے جاری بیان میں کہا گیا کہ جنوبی ایشیا میں سیکیورٹی، استحکام
اور خوشحالی کیلئے امریکا پاکستان کی نئی حکومت کے ساتھ مل کر کام کرے گا جیسا کہ پچھلی حکومتوں کے ساتھ بھی تعاون کرتا رہا ہے۔ دونوں مملک کا مل کر کام کرنا خطے کے مفاد میں ہے اس لیے اس موقع کو کھونا نہیں چاہیے۔واضح رہے کہ عام انتخابات میں تحریک انصاف نے برتری حاصل کر کے حکومت بنانے کی پوزیشن میں آگئی ٗ انتخابی نتائج کے بعد عمران خان نے اپنی پہلی پریس کانفرنس میں بھی بھارت سمیت امریکا اور دیگر ممالک کے ساتھ خوشگوار تعلقات کے قیام کی خواہش کا اظہار کیا تھا۔
