نئی دہلی(آن لائن)آل انڈیا مجلس اتحاد المسلمین کے صدر اسد اللہ اویسی نے بھارتی مسلمانوں کو ’پاکستانی‘ کہنے والے کو سزا دینے کیلئے قانون سازی کا مطالبہ کردیا ہے۔بھارتی میڈیا رپورٹ کے مطابق بد ھ کو لوک سبھا میں تقریرکرتے ہوئے آل انڈیا مجلس اتحاد المسلمین کے صدر اسد اللہ اویسی نے کہا کہ اگر کوئی قصور وار پایا جائے تو اْسے 3سال قید کی سزا دی جائے۔

واضح رہے کہ اسداللہ اویسی کا یہ بیان بریلی کے ڈسٹرکٹ مجسٹریٹ کے ریمارکس کے چند روز بعد سامنے آیا جس میں اْنہوں نے کہا تھا کہ یہ رجحان بن گیا ہے کہ بزور طاقت مسلمانوں کی آبادی میں داخل ہوکر پاکستان مخالف نعرے لگاؤاور حالات خراب کرو۔ڈسٹرکٹ مجسٹریٹ رگھویندر وکرم سنگھ نے اترپردیش کے علاقے کاس گنج میں بھارتی یوم جمہوریہ پر فسادات کے دوران ایک نوجوان کی ہلاکت کے بعد فیس بک پر پوسٹ میں لکھا تھا کہ ’’عجیب رواج بن گیا ہے کہ مسلمانوں کے محلوں میں زبردستی جلوس لے کر جاؤاور پاکستان کیخلاف نعرے لگاؤ، کیا وہ پاکستانی ہیں؟، یہی یہاں بریلی میں ہوا، پھر پتھراؤ ہوا اور مقدمے لکھے گئے‘‘سخت ردعمل کیبعد ڈسٹرکٹ مجسٹریٹ نے اپنی پوسٹ ڈیلیٹ کردی تھی تاہم اْن کا کہنا تھا کہ وہ اپنے ریمارکس پر قائم ہیں۔