ممبئی(نیوزڈیسک)بھارت میں خوف کی علامت سمجھا جانے والا انڈر ورلڈ ڈان داؤد ابراہیم بے پناہ دولت اور طاقت کے باوجود بڑی پریشانی کا شکار ہوگیاہے،جس کی وجہ اس کا اکتیس سالہ اکلوٹا بیٹا معین نواز کاسٹر بتایاجارہاہے ، معین نواز عرصے سے داؤد ابراہیم کے تجارتی امور میں ان کی معاونت کررہاتھا لیکن اچانک معین نواز کاسکر کی کایا پلٹ گئی اور اس کا رجحان بدل گیا
اور اس نے مذہبی تعلیم حاصل کرنے کے بعد مذہب پرسختی سے عمل پیرا ہونے کا فیصلہ کرلیا اور اب اسے ’مولانا معین نواز کاسکر‘ کے نام سے جانا جارہا ہے۔پردیپ شرما کے مطابق داؤد ابراہیم کے چھوٹے بھائی اقبال کاسکر نے بتایا ہے کہ داؤد ابراہیم اپنے اکلوتے بیٹے معین نوازکاسکر کی وجہ سے شدید ذہنی دباؤ کا شکار ہیں ،معین نواز کاسکر اپنے والد کی غیرقانونی سرگرمیوں سے اختلاف رکھتے ہیں ان کا کہنا ہے کہ مافیا ڈان ہونے کی وجہ سے خاندان کی دنیابھر میں بدنامی ہورہی ہے ،دوسری جانب داؤد ابراہیم اس بات پر بھی فکر مند ہے کہ اس کے مرنے کے بعد انڈرورلڈ کاذمہ دار کون بنے گا اور اس کی خطیر دولت کس کو ملے گی، واضح رہے کہ داؤد ابراہیم کا چھوٹابھائی اقبال ابراہیم بھتہ خوری کے مقدمات میں گرفتار ہے جبکہ اس کے ایک اوربھائی انیس ابراہیم کی عمر کافی زیادہ ہے اور وہ اکثر بیمار رہتاہے اس کے علاوہ اس کے دیگر بھائیوں کا انتقال ہوچکاہے، معلوم ہوا ہے کہ داؤد ابراہیم کا اکلوتا بیٹا معین نوازکاسکر انڈر ورلڈ سے کنارہ کش ہوکر اپنی بیوی اورتین بچوں کے ساتھ مسجد انتظامیہ کی طرف سے دیئے گئے ایک چھوٹے سے کوارٹر میں زندگی گزاررہاہے اور مذہبی تعلیم میں مصروف ہے، بعض اوقات وہ نماز کی امامت بھی کرواتے ہیں۔
