برن(مانیٹرنگ ڈیسک) سوئٹرز لینڈ کے گاؤں البینن نے مکینوں کی تعداد میں کمی کے پیش نظر وہاں رہائش اختیار کرنے والوں کو 25ہزار سوئس فرانک( 26 لاکھ 80 ہزار روپے)فی فرد دینے کا فیصلہ کیا ہے۔غیر ملکی میڈیا رپورٹ کے مطابق یہ رقم وہاں مستقل رہائش اختیار کرنے والے فرد کو دی جائے گی، اگر اہل خانہ ساتھ ہوں گے تو ہر بچے کے عوض 10ہزار سوئس فرانک کی اضافی رقم دی جائے گی تاہم مقامی انتظامیہ نے اس ضمن میں چند شرائط عائد کی ہیں جن کے مطابق 25ہزار سوئس فرانک کی رقم اس شخص کو دی جائے گی جو یہاں کم از کم 10 سال کے لئے رہائش اختیار کرے

گا، اس کی عمر 45سال سے زائد نہ ہو، وہ وہاں سیاحت کے لئے نہ آیا ہو بلکہ وہاں کم از کم 2 لاکھ فرانک کی پراپرٹی خریدے۔ 10 سال سے کم عرصے میں واپس جانے والے شخص کو حکومت کی جانب سے ملنے والی رقم واپس کرنی ہوگی۔واضح رہے کہ سوئٹزر لینڈ کے اس چھوٹے سے گاؤں میں مقیم افراد کی تعداد محض 240ہے جس میں اضافے کیلئے مقامی انتظامیہ نے یہ فیصلہ کیا ہے۔ گاؤں کے رہائشی اس تجویز کی منظوری کے حوالے سے 30 نومبر کو ووٹنگ میں حصہ لیں گے۔خیال رہے کہ سیاحت یا روزگار کے حوالے سے سوئٹزر لینڈ دنیا کا سب سے زیادہ پرکشش ملک ہے۔

موضوعات:سوئٹرز لینڈ