اسلام آباد(مانیٹرنگ ڈیسک)اسلامی افواج کے اتحاد کی کانفرنس کے دوران راحیل شریف نے تمام بے بنیاد افواہوں کو یکسر مسترد کرتے ہوئے اسلامی فوجی اتحاد کو صرف اور صرف دہشتگردی کے خلاف قرار دیدیا۔ تفصیلات کے مطابق اسلامی افواج کے اتحاد کی کانفرنس کے موقع پر
نجی ٹی وی دنیا نیوز کے اینکر وجاہت سعید خان نے وہاں موجود سابق پاکستانی آرمی چیف جنرل(ر)راحیل شریف جو اس وقت اسلامی افواج کے اتحاد کی سربراہی کر رہے ہیں سے سوال پوچھا کہ کچھ افواہیں ہیں کہ اسلامی فوجی اتحاد کو صرف ایران کی مشرق وسطیٰ میں بڑھتی مداخلت کے پیش نظر ترتیب دیا گیا ہے جس پر جواب دیتے ہوئے جنرل(ر)راحیل شریف کا کہنا تھا کہ اسلامی فوجی اتحاد صرف اور صرف دہشتگردی کے خلاف ہے یہ کسی ملک، کسی فرقے اور مذہب کے خلاف ترتیب ہیں دیا گیا اس کے قیام کا مقصد اسلامی ممالک میں دہشتگردی کا خاتمہ ہے۔ راحیل شریف نے سوال کے ابتدائی حصوں کا جواب دیتے ہوئے کہا کہ یہ بات صحیح ہے کہ مختلف ممالک کی افواج میں چند خوبیاں ہیں اور اسی طرح چند کمزوریاں بھی پائی جاتی ہیں ۔ اسلامی فوجی اتحاد میں ہم رکن ممالک کی افواج کی تربیت کا اہتمام کر رہے ہیں ۔ کچھ افواج شہری علاقوں میں آپریشن کے حوالے سے کامیاب سمجھی جاتی ہیں اور کچھ پسماندہ اور دیہاتی علاقوں میں کامیاب ہیں جبکہ کچھ افواج میں بہترین انٹیلی جنس شیئرنگ کی خوبیاں ہیں ۔ ہم ان تمام خوبیوں کو یکجا کر کے کمزوروں کو ختم کرنے کی کوشش کر رہے ہیں اور جلد ہی تربیت کا عمل مکمل ہوتے ہی میڈیا نمائندوں کو تربیتی سینٹر میں دعوت دی جائے گی جہاں وہ اسلامی فوج کو دیکھ کر خود اندازہ لگا لیں گے۔
