پیانگ یانگ (مانیٹرنگ ڈیسک) شمالی کوریا نے ایک بار پھر امریکی صدر ڈونلڈ ٹرمپ کو شدید تنقید کا نشانہ بناتے ہوئے امریکہ کو متنبہ کیا ہے کہ ’پاگل بوڑھے شخص‘کو صدارت سے فورا ہٹایا جائے ورنہ واشنگٹن تباہی کیلئے تیار ہو جائے۔جنوبی ایشیاء کے 5 ممالک کے دورے پر

موجود امریکی صدر نے جنوبی کوریا میں شمالی کوریا کیخلاف سخت الفاظ استعمال کرتے ہوئے کہا تھا کہ ہم اس چیز کی ہرگز اجازت نہیں دینگے کہ ہمارے شہروں کو تباہ کرنے کی دھمکیاں دی جائیں اور ہمیں جوہری ہتھیاروں سے خوفزدہ کیا جائے ، انہوں نے کہا کہ شمالی کوریا میں انسانی حقوق کی سنگین خلاف ورزیاں ہو رہی ہیں وہاں کے شہری عقوبت خانے کی مانند زندگی بسر کرتے ہیں اور سرکاری ملازمین قیدیوں کی طرح کام کرتے ہیں۔امریکی صدر کے بیان پر شدید ردعمل دیتے ہوئے شمالی کوریا کے رہنماء کم جانگ ان نے کہا کہ بدنام سیاسی‘ رہنما ڈونلڈ ٹرمپ کی وجہ سے دنیا ایک عجیب و غریب صورتحال سے گزر رہی ہے۔انہوں نے کہا کہ ڈونلڈ ٹرمپ بوڑھا پاگل آدمی ہے ، امریکہ ٹرمپ کو فوری طور پر برطرف کر کے شمالی کوریا کیخلاف اپنی معاندانہ پالیسی ترک کرے اور تباہی کی دلدل میں پھنسنے سے بچے۔انہوں نے کہا کہ اگر امریکہ جوہری تباہی نہیں چاہتا تو اس کے پاس بہترین موقع ہے کہ وہ اس حوالے سے فیصلہ کر لے۔