جے پور (این این آئی)بھارت کے ایک سکول میں ٹیچر نے معصوم طالبہ کا ریپ کرنے کے بعد اس کا اسقاط حمل بھی کروادیاجس کے بعد بچی کی حالت تشویشناک ہوگئی ہے ،،بھارتی ٹی وی کے مطابق واقعہ ریاست راجستھان کے سیکر شہر میں ایک نجی سکول میں پیش آیا، ریپ کے الزام میں سکول کے ایک منتظم اور ٹیچر کو گرفتار کرلیاگیا اورسکول کو بھی فی الحال بند کر دیا گیا ہے،پولیس کے مطابق سکول کے ٹیچر پر الزام ہے
کہ وہ 12ویں جماعت کی طالبہ کو سکول کے ایک دوسرے کمرے میں لے جا کر اس کے ساتھ جنسی زیادتی کر رہا تھا۔سیکر پولیس کے مطابق یہ واقعہ اس وقت سامنے آیا جب متاثرہ کے پیٹ میں درد ہوا۔ اس کے رشتے دار اسے ایک نجی ہسپتال میں لے گئے۔ الزام ہے کہ ہسپتال سے ملی بھگت کر کے سکول کے منتظم نے لڑکی کا اسقاط حمل کروا دیا۔لیکن جب متاثرہ لڑکی کی حالت بگڑی تو اسے جے پور کے سوائی مان سنگھ ہسپتال لے جایا گیا۔ متاثرہ لڑکی کا بیان لینے کے لیے پولیس اس کے ہوش میں آنے کا انتظار کر رہی ہے۔پولیس کے مطابق سیکر ضلع کے ایک گاؤں میں واقع نجی سکول ‘جنتا بال نکیتن‘ کے منتظم جگدیش یادو اور ٹیچر جگت سنگھ گرجر کو گرفتار کر لیا گیا ہے۔علاقے کے پولیس اہلکار کشل سنگھ نے بتایا کہ دونوں ملزمان سے تفتیش کی جا رہی ہے۔کشل سنگھ نے کہا کہ یہ ایک سنجیدہ معاملہ ہے اور اس میں مجرمان کے خلاف سخت قانونی کارروائی کی جائے گی۔پولیس اس نجی ہسپتال کے خلاف بھی تحقیقات کر رہی ہے جہاں متاثرہ لڑکی کا ’دھوکے‘ سے اسقاط حمل کروایا گیا۔اس واقعے کے بعد علاقے میں تناؤ ہے۔ لوگوں نے سکول کے باہر احتجاج کیا۔ گاؤں والوں نے سکول میں توڑ پھوڑ بھی کی۔
