سرینگر(اے این این ) سید علی گیلانی کی طبیعت خراب ہو گئی،معائنے کے بعد صورہ ہسپتال سے فارغ ،میر واعظ اور مولانا سعید احمد کی ہسپتال جا کر عیادت،گھر میں بھی حریت رہنماؤں کا تانتا بندھ گیا ،جلد صحت یابی کی دعا۔گزشتہ روز سید علی گیلانی کو علالت کے باعث سری نگر کی صورہ ہسپتال منتقل کیا گیا جہاں انھیں چند گھنٹے آبزرویشن میں رکھا گیا اور علاج معالجے کے بعد گھر منتقل کر دیا گیا ۔حریت چیئرمین میرواعظ عمر فاروقبھی صورہ میڈیکل انسٹی چیوٹ پہنچے

جہاں انہوں نے سید علی شاہ گیلانی کی مزاج پرسی کی۔ میرواعظ عمرنے اس دوران سید علی گیلانی کی صحت سے متعلق جانکاری بھی حاصل کی،جبکہ انکی شفایابی کیلئے بھی دعابھی کی۔دونوں مزاحمتی لیڈروں نے کچھ وقفہ میں آپس میں بات چیت بھی کی۔اس سے قبل جامع مسجد سرینگر کے امام حی مولانا سعید احمد سعید نقشبندی بھی صورہ میڈیکل انسٹی چیوٹ پہنچے جہاں انہوں نے علیل سید علی گیلانی کی مزاج پرسی کی۔دریں اثنا بزرگ لیڈر کو شام 7بجے اسپتال سے رخصت کیا گیا۔گھر پہنچنے پر ان کی عیادت کیلئے شہریوں اور حریت رہنماؤں کا تانتا بندھ گیا۔عیادت کیلئے آنے والے سید علی گیلانی کی جلد صحت یابی کی دعا کرتے رہے ۔