ریوڈی جنیرو(این این آئی)برازیل کے سابق صدر کو کرپشن اور منی لانڈرنگ کرنے پر ساڑھے نو سال کے لیے جیل بھیج دیا گیا، تاہم اپیل کی سماعت تک وہ آزاد رہیں گے۔غیرملکی خبررساں ادارے کے مطابق برازیل کے سابق صدر لوئیز لولا ڈی سلوا 2003 سے 2010 تک برازیل کے صدر رہے ہیں اور ان پر ریاستی سرپرستی میں چلنے والے ایک آئل گروپ پیٹرو براس میں خورد برد اور کرپشن کرنے کا الزام ہے۔
اکہترسالہ برازیلی صدر کا کہنا تھا کہ وہ بے گناہ ہیں اور مقدمات انہیں اقتدار میں آنے سے روکنے کے لیے قائم کیے جارہے ہیں۔ان کے وکلا کا کہنا تھا کہ وہ فیصلے کے خلاف اپیل کریں گے اور ثابت کریں گے کہ الزامات غلط ہیں۔لولا ڈی سلوا پر ایک پرتعیش گھر اور گیارہ لاکھ ڈالر رشوت لینے کا الزام ہے۔ جج نے ان کے گھر کو بھی قبضے میں لینے کا حکم دیا ہے۔
