اسلام آباد (مانیٹرنگ ڈیسک) ملائشین ائیر لائن ایم ایچ 370 کی تباہی کا ڈراپ سین، طیارہ کہاں گرا اور ملبہ اب کہاں ہے؟ تفصیلات کے مطابق ملائیشین ائیرلائن کے طیارے ایم ایچ 370 کو لاپتہ ہوئے تین سال سے زائد کا عرصہ ہو چکا ہے۔ زیادہ تر لوگ اس فضائی حادثے کو بھول ہی چکے تھے تو اسی دوران کچھ سائنسدانوں نے دعویٰ کیا ہے کہ انہوں نے پرواز ایم ایچ 370کا سراغ لگا لیا ہے۔

ملائیشین ائرلائن کا بوئنگ777 طیارہ کوالا لمپور سے بیجنگ جاتے ہوئے 8 مارچ 2014ء بروز ہفتہ لاپتہ ہوا تھا۔ اس طیارے میں عملے سمیت 245 افراد سوار تھے۔ طیارے کی تلاش میں کئی ممالک کی ٹیموں نے مشترکہ آپریشن کا آغاز کیا لیکن سب بے سود گیا کچھ پتہ نہ چل سکا۔ ڈیلی سٹار کی ایک رپورٹ کے مطابق آسٹریلیا کے ادارے ’’کامن ویلتھ سائنٹیفک اینڈ انڈسٹریل ریسرچ آرگنائزیشن‘‘ کے ماہرین نے کہا ہے کہ انہوں نے طیارے کا سراغ لگا لیا ہے، ان ماہرین کے مطابق اس طیارے کا ملبہ جنوبی بحر ہند کے سیونتھ آرک سمندری علاقے میں موجود ہے۔ اس علاقے میں گزشتہ سال بھی دو مرتبہ اس طیارے کے ملبے کو تلاش کی کوشش کی گئی مگر کوئی کامیابی حاصل نہ ہو سکی۔ ماہرین کا دعویٰ ہے کہ انہوں نے سپیشلسٹ سونار، وڈیو کیمروں اور سینسرز کی مدد سے دو سال کی تحقیق کے بعد پتہ چلایا ہے کہ طیارے کا ملبہ اسی علاقے میں موجود ہے۔ اس سے پہلے افریقہ کے مشرقی ساحل کے قریب طیارے کے پر کا ایک حصہ ملا تھا،اس کے جواب میں ماہرین کہتے ہیں کہ شمال مغرب کی سمت بہنے والی سمندری موجوں کی وجہ سے طیارے کا ملبہ پانی میں بہتا چلا گیا اور اس کا پتا چلانا مشکل ہو گیا تھا۔کامن ویلتھ سائنٹیفک اینڈ انڈسٹریل ریسرچ آرگنائزیشن کے ان ماہرین نے اس دریافت کو ایم ایچ 370 کے ملبے کی تلاش میں اب تک کی سب سے بڑی پیشرفت قرار دیا ہے اور توقع ظاہر کی ہے کہ بہت جلد سمندر کی تہہ میں موجود ملبے تک رسائی حاصل کرنے میں وہ کامیاب ہو جائیں گے۔