واشنگٹن(این این آئی)امریکا سے تعلق رکھنے والے 35 سالہ جیمز سیسوم اور 32 سالہ ایشلے شمیدر نے دنیا کی بلند ترین چوٹی مائونٹ ایورسٹ پر جاکر شادی رچا لی۔ یہ شادی مائونٹ ایورسٹ کیمپ پر ہوئی جہاں وہ اس سے قبل تین ہفتے تک ہائیکنگ کرتے رہے تھے۔
میڈیارپورٹس کے مطابق ایشلے نے ایک انٹرویو کے دوران بتایا کہ کافی سوچ بچار کے بعد ہم نے فیصلہ کیا کہ روایتی انداز سے شادی ہمارے لیے درست انتخاب نہیں، اگرچہ ہم اپنے اس خاص دن کو گھروالوں اور دوستوں کے ساتھ شیئر کرنا پسند کرتے، مگر ہم دونوں نے اس خیال کو اپنایا کہ ان حیران کن تعطیلات کے دوران شادی کے بندھن میں بندھا جائے۔جیمز نے سوٹ جبکہ ایشلے نے سفید رنگ کا روایتی عروسی لباس زیب تن کیا، ان کی اس تقریب کو ایک ایڈونچر ویڈنگ فوٹوگرافر چارلیٹن چرچل نے کیمرے کی آنکھ میں محفوظ کیا۔فوٹوگرافر نے اپنی ویب سائٹ پر ایک بلاگ پوسٹ میں اس تقریب کی تفصیلات بیان کرتے ہوئے لکھا سفر کے آغاز میں بہت زیادہ برفباری ہورہی تھی، ہمارے گائیڈ کے مطابق ہمارے اوپر پورے موسم سرما سے زیادہ برف گرسکتی ہے، 14 ہزار فٹ کی بلندی پر درجہ حرارت منفی 8 سے 10 فارن ہائیٹ تک گرگیا تھا اور ہمارے ہاتھ دستانوں سے نکلتے ہی منجمند ہوجاتے، جیسا کہ تصاویر لینے کی کوشش کے دوران میرے ساتھ ہوا۔
