بیجنگ (آ ئی این پی ) چین کے ممتاز سرکاری اخبارنے ایک کالم میں پاکستان اوربھارت کے درمیان مسئلہ کشمیر کے حل کو بیجنگ کا ‘وسیع تر مفاد’قراردیتے ہوئے کہا ہے کہ ایک خطہ، ایک سڑک’ پروجیکٹ میں سرمایہ کاری کی وجہ سے چین ، پاکستان اور بھارت کے درمیان تنازع کا باعث بننے والے مسئلہ کشمیر کے حل میں دلچسپی رکھتا ہے،چین غیر ممالک میں چینی سرمایہ کاروں کے تحفظ کے مطالبے پر کان بند نہیں کرسکتا۔
چائنہ ریڈیو انٹرنیشنل کے مطابق معروف اخبارگلوبل ٹائمز نے اپنے ایک مضمون میں لکھا ہے کہ چین ہمیشہ سے دیگر ممالک کے اندرونی معاملات میں مداخلت نہ کرنے کے اصول پر عمل پیرا رہا ہے لیکن چینی سرمایہ کاروں کے تحفظ کے مطالبے پر کان بند نہیں کرسکتا اور ا یک خطہ، ایک سڑک پروجیکٹ کے تحت مختلف ممالک میں بیجنگ کی بھاری سرمایہ کاری کے تناظر میں چین، پاکستان اور بھارت کے درمیان مسئلہ کشمیر کے حل سمیت دیگر تنازعات کے حل میں ذاتی دلچسپی رکھتا ہے۔کالم میں مشورہ دیا گیا کہ بیجنگ اپنے مضبوط تجارتی اثر کی بنا پر خطے میں ان تنازعات کو حل کرنے کی صلاحیت رکھتا ہے، ساتھ ہی اس بات پر بھی زور دیا گیا کہ ہندوستان سمیت خطے کی ‘بڑی طاقتوں’ سے نمٹنے کے لیے دانائی سے کام لینا ضروری ہے۔مزید کہا گیا بیرون ملک اپنے مفادات کے تحفظ کی غرض سے علاقائی تنازعات سے نمٹنے کے لیے مسئلہ کشمیر کے معاملے پر پاکستان اور بھارت کے درمیان ثالثی، چین کے لیے شاید سخت چیلنجز میں سے ایک ہوگی ۔یہ بھی کہا گیا کہ ‘چین کو ایک مستحکم طاقت کے طور پر کھڑا رہنا سیکھنا ہوگا’۔کالم میں مزید کہا گیا چین کو اس حوالے سے ابھی بہت کچھ سیکھنا ہے کہ اسے ایک علاقائی طاقت کے طور پر کس طرح اپنا کردار نبھانا ہے، وہ بھی ایک ایسے وقت میں جبکہ ملک سے باہر براہ راست سرمایہ کاری ان دنوں اپنے عروج پر ہے۔
