واشنگٹن/پیانگ یانگ (این این آئی)جنوبی کوریا کی فوج نے دعویٰ کیا ہے کہ شمالی کوریا نے مشرقی ساحل پر میزائل تجربہ کرنے کی کوشش کی ہے جو بظاہر ناکام ہو گئی ہے۔غیرملکی خبررساں ادارے کے مطابق جنوبی کوریا کی فوج کا کہنا تھا کہ شمالی کوریا نے نامعلوم میزائل کا تجربہ کرنے کی کوشش کی ہے، جبکہ وہ مشتبہ تجربہ ناکام ہو گیا ہے۔فوج کے مطابق وہ مزید معلومات کے لیے تحقیقات کر رہے ہیں۔بعد میں امریکی کمانڈ نے بھی ناکام تجربے کی تصدیق کی اور کہا کہ

انھوں نے ڈیٹیکٹ کیا اور پیچھا کرنے پر معلوم ہوا کہ وہ بظاہر شمالی کوریا کا بیلسٹک میزائل تھا۔امریکی بحریہ کے کمانڈر ڈیو بینہم نے کہاکہ میزائل تقریباً فوراً ہی پھٹ گیا تھا۔یہ تجربہ ایک ایسے وقت میں ہوا ہے جب ایک ہی روز قبل شمالی کوریا نے خطے میں بڑھتے ہوئے تناؤ کے پیش نظر امریکہ کو خبردار کیا تھا کہ وہ جوابی جوہری حملے کے لیے تیار ہے،خیال رہے کہ شمالی کوریا پہلے ہی پانچ جوہری تجربے اور سلسلہ وار میزائل داغ چکا ہے۔تاہم فی الحال یہ واضح نہیں ہے کہ شمالی کوریا نے اتوار کو کون سے میزائل کا تجربہ کرنے کی کوشش کی ۔اس سے قبل شمالی کوریا کے بانی صدر کم ال سنگ کی 105 ویں یوم پیدائش کی تقریبات کے موقع پر شمالی کوریا نے سنیچر کو بظاہر اپنا ممکنہ جوہری تجربہ کرنے سے گریز کیا لیکن اپنی جدید عسکری قوت کا مظاہرہ کرتے ہوئے ایک بار پھر امریکہ کو متنبہ ضرور کیا تھا۔پیانگ یانگ میں ہونے والی فوجی پریڈ میں شمالی کوریا نے پہلی بار بیلسٹک میزائل کی نمائش کی جو آبدوز سے لانچ کیے جانے والے میزائل سے مشابہت رکھتا ہے۔ اس میزائل میں ایٹمی وار ہیڈ لے جانے کی صلاحیت بھی ہے۔اس موقع پر شمالی کوریا کے راہنما کم جونگ اْن کے قریبی ساتھی چوے ریونگ اھے نے جو کہ ملک کے دوسرے سب سے طاقتور شخص سمجھے جاتے ہیں، خطاب کرتے ایک بار پھر امریکہ کو خبر دار کیا۔

موضوعات:شمالی کوریا