واشنگٹن(آن لائن)امریکی صدر ڈونلڈ ٹرمپ کی بیٹی ایوانکا نے اپنی ننھی پری کے ساتھ واشنگٹن میں چین کے سفارت خانہ کا اچانک دورہ کیا۔ ان کی آمد نے عملے کو خوشگوار حیرت میں ڈال دیا۔ایوانکا کے ساتھ ان کی پانچ سالہ بیٹی ارابیل تھیں جو چینی زبان سیکھ رہی ہیں۔ماں نے پانچ سالہ بیٹی کا تعارف اپنی “مترجم” کہہ کر کرایا۔سفارت خانے میں نئے چینی سال اورموسم بہار کی آمد کی خوشی میں
میلا سجا تھا۔ایوانکا نے اپنی بیٹی کے ساتھ مختلف اسٹالز دیکھے۔جہاں چین کے روایتی مجسمے اور چیزیں سجی تھیں۔چینی میزبانوں نے اپنے امریکی مہمانوں کو تحائف بھی پیش کئے۔ایوانکا نے سوشل میڈیا پر ایک ویڈیو بھی شئیر کی جس میں ان کی بیٹی سرخ ڈریگن کے ساتھ چینی گانا گا کرچینیوں کو نئے سال کی مبارک باد دے رہی ہے۔
